Pesë personat e arrestuar në kuadër të hetimit për një komplot të dyshuar pranë bazës ajrore amerikane Fairford, në Gloucestershire, janë liruar me kusht.
Policia britanike kundër terrorizmit bëri të ditur se të pesë të arrestuarit janë shtetas britanikë, të moshës nga 20 deri në 25 vjeç. Pavarësisht lirimit, hetimi ndaj tyre do të vijojë.
Të rinjtë u arrestuan pasi banorë të zonës njoftuan policinë për tre automjete që po lëviznin në drejtim të bazës ajrore Fairford, e cila përdoret nga forcat amerikane. Ata u ndaluan nën dyshimin për përgatitjen e një akti terrorist.
Autoritetet britanike po hetojnë gjithashtu dyshimet se personat mund të kenë vepruar në emër të një shteti të huaj. Një prej pistave të hetimit lidhet me mundësinë e përfshirjes së Iranit, por Ambasada e Republikës Islamike të Iranit në Londër e ka mohuar këtë akuzë.
Sekretarja e Brendshme britanike, Shabana Mahmood, tha se hetimi përbën një kujtesë për nevojën e vigjilencës përballë kërcënimeve të mundshme.
“Ju kurrë nuk do të na mposhtni”, deklaroi Mahmood, duke iu drejtuar personave që mund të tentojnë të kryejnë sulme në territorin britanik.
Pas incidentit, rreth 85 familje nga fshati përreth bazës u evakuuan, ndërsa policia vendosi një perimetër sigurie në zonë.
Autoritetet kanë njoftuar ndërkohë se zona është konsideruar e sigurt dhe banorët e evakuuar kanë nisur të rikthehen në banesat e tyre. Hetimet për rrethanat e incidentit dhe motivet e personave të arrestuar vijojnë.