Një vallëzim tradicional shqiptar i Dua Lipës në një dasmë familjare në Prishtinë ka tërhequr vëmendjen e mediave britanike, pasi këngëtarja u shfaq duke vallëzuar përkrah babait të saj, Dukagjin Lipës, ndërsa mbante një gotë të balancuar mbi kokë.
Sipas Daily Mail, ylli i muzikës pop kaloi fundjavën në Kosovë për të marrë pjesë në dasmën e kushëririt të saj, And Gjakova, i cili u martua me Rozafa Kelmendin në Prishtinë.
Dua ndau në Instagram disa momente nga ceremonia, të cilën e përshkroi si një “dasmë të madhe shqiptare”. Vëmendjen kryesore e mori videoja ku ajo shfaqet duke vallëzuar bashkë me të atin, ndërsa të pranishmit e shoqërojnë me duartrokitje dhe brohoritje.
Edhe Dukagjini iu bashkua atmosferës së festës, duke komentuar me humor: “Unë ende po vallëzoj.” Ndërkohë, fansat e këngëtares e mbushën postimin me komente pozitive, duke vlerësuar mënyrën se si ajo iu bashkua traditave shqiptare.
Në një tjetër postim, Dua i kushtoi një mesazh çiftit të sapomartuar:
“Kushëriri im u martua me gruan e ëndrrave të tij dhe ne bëmë një dasmë të madhe shqiptare!”
Më pas, ajo shkroi në shqip: “Po na rritet rrethi!!!!!”
Në dasmë Dua u shfaq së bashku me familjarët e saj, përfshirë babanë Dukagjin, nënën Anesa, motrën Rina dhe vëllain Gjin. Për ceremoninë, këngëtarja zgjodhi një fustan të zi elegant me pupla dhe me pjesën e pasme të hapur.
Gjatë qëndrimit në Prishtinë, ajo publikoi edhe fotografi dhe selfie me familjarët, duke ndarë me ndjekësit momente nga festimet.
Dua Lipa ka folur vazhdimisht me krenari për prejardhjen e saj shqiptare nga Kosova. E lindur në Londër në vitin 1995, ajo u rrit në një familje shqiptare dhe shqipja ishte gjuha e saj e parë.
Familja e saj u rikthye në Prishtinë pas shpalljes së pavarësisë së Kosovës në vitin 2008, ndërsa Dua u kthye në Britani në moshën 15-vjeçare për të ndjekur karrierën muzikore.
Në vitin 2022, ajo mori edhe shtetësinë shqiptare, ndërsa së bashku me të atin ka themeluar Sunny Hill Foundation, përmes së cilës mbështeten iniciativa sociale dhe kulturore në Kosovë.
Pas martesës me Callum Turner
Paraqitja e Duas në dasmën familjare në Prishtinë vjen disa muaj pas martesës së saj me aktorin Callum Turner.
Në një intervistë për Vogue Italia, këngëtarja ka treguar se gjatë ditës së martesës ajo dhe Turner u përpoqën të qëndronin pranë njëri-tjetrit mes turmës së të ftuarve.
“Dita jonë e dasmës ishte magjike”, është shprehur Dua, duke treguar se çifti kishte vendosur ta përjetonte ceremoninë edhe si mysafirë dhe të gjente vazhdimisht njëri-tjetrin mes të ftuarve.
Këngëtarja ka folur gjithashtu për mënyrën se si balancon karrierën me jetën personale, duke theksuar rëndësinë e mbështetjes së ndërsjellë në marrëdhënien me Turner.
Ajo ka pranuar se lumturia në jetën personale mund të ndikojë edhe në muzikën e saj të ardhshme. Sipas saj, këngët e dashurisë shpesh lidhen me dhimbjen e një zemre të thyer, ndërsa tani dëshiron të eksplorojë në muzikë edhe përvojën e një dashurie të plotë dhe të qëndrueshme.
Ndërkohë, Turner ka folur hapur për dëshirën për të krijuar familje në të ardhmen. Në një intervistë për Esquire UK, aktori është shprehur se dëshiron të ketë fëmijë, ndërsa e ka përshkruar martesën me Dua Lipën si “ditën më të bukur” të jetës së tij.
Edhe Dua Lipa ka deklaruar më herët se dëshiron të bëhet nënë një ditë, megjithëse ka pranuar se ende nuk e di se kur do të jetë momenti i duhur, duke pasur parasysh angazhimet e saj profesionale dhe turnetë muzikore.