Sekretari amerikan i Shtetit, Marco Rubio, ka deklaruar se pas incidentit të dyshimtë në bazën ajrore RAF Fairford në Britani qëndron “qartë” një aktor i huaj, ndërsa pesë personat e arrestuar pranë bazës janë liruar me kusht.
Në një intervistë për Fox News, Rubio e cilësoi ngjarjen si një situatë “shumë serioze” dhe tha se “qartë përfshin dorën e një aktori të huaj”. Megjithatë, sekretari amerikan i Shtetit nuk paraqiti prova për të mbështetur këtë pretendim.
Deklaratat e Rubios erdhën disa orë pasi pesë të dyshuarit, të arrestuar pranë RAF Fairford, u liruan me kusht. Më herët, presidenti amerikan Donald Trump tha se nuk do t’i kishte liruar të dyshuarit.
Ne dimë gjithçka për ta. Ne nuk do t’i kishim liruar.
I pyetur nëse çështja kishte lidhje me Iranin, presidenti amerikan u përgjigj:
Mund të jetë.
Kur gazetarët kërkuan më shumë detaje, Trump tha se preferonte të mos fliste për këtë çështje.
Do të preferoja të mos e bëja. Dua të them, e di përgjigjen, mund të jem shumë specifik, por preferoj të mos e them. Unë nuk do t’i kisha liruar.
Trump ka lënë të kuptohet më herët se autoritetet amerikane kishin dijeni për komplotin e dyshuar, ndërsa burime britanike sugjeruan se aktivitetet konkrete të pesë personave nuk ishin të njohura për autoritetet amerikane.
Ndërkohë, drejtuesi i policisë britanike kundër terrorizmit, ndihmës-komisioneri Laurence Taylor, ka theksuar se lirimi i të dyshuarve me kusht nuk nënkupton se hetimi ka përfunduar. Sipas tij, pesë personat i nënshtrohen “kushteve të rrepta”.
Në sfondin e hetimit qëndrojnë edhe shqetësimet britanike për aktivitetet e dyshuara të Iranit përmes personave të ndërmjetëm në Mbretërinë e Bashkuar.
