Futbolli jo vetëm një lojë! Ja si djemtë e Kombëtares e ndihmuan Jonin të mposhtë sëmundjen
Për shumëkënd futbolli është një lojë 90-minutëshe. Për Jonin e vogël, ai është kthyer në një burim force, motivimi dhe emocioni gjatë një prej periudhave më të vështira të jetës së tij.
Historia nisi në vitin 2025, kur familja e Jonit iu drejtua Federatës Shqiptare të Futbollit me një kërkesë të veçantë. Joni po përgatitej për një ndërhyrje të vështirë kirurgjikale, në kuadër të trajtimit të tij për kancerin, dhe familja dëshironte një video-mesazh inkurajues nga një prej futbollistëve të tij të preferuar, Kristjan Asllani.
Kërkesa nuk mbeti pa përgjigje. FSHF-ja ndërhyri për ta realizuar dëshirën e familjes dhe Joni mori mesazhin e Asllanit pikërisht në një prej momenteve më të vështira të betejës së tij.
Një vit më vonë, familja u rikthye të kontaktonte federatën me një lajm tjetër. Joni kishte kaluar një periudhë të gjatë dhe të vështirë trajtimi, përfshirë kimioterapinë, dhe tashmë ishte në rrugën e rikuperimit.
Sipas familjes, mbështetja dhe mesazhet e Kombëtares shqiptare kishin qenë një motivim i veçantë për Jonin gjatë gjithë kësaj periudhe.
Kësaj here, FSHF-ja vendosi ta surprizonte sërish. Për Jonin mbërritën mesazhe nga disa prej futbollistëve të Kombëtares: Kristjan Asllani, Elseid Hysaj, Mario Mitaj, Thomas Strakosha, Arber Hoxha dhe Klaus Gjasula i përcollën fjalët e tyre të mbështetjes dhe urimet.
Por surpriza nuk përfundoi me videot.
Për ndeshjen Shqipëri–Bjellorusi, Joni u ftua të ishte i pranishëm në stadium. Për të ishte një mundësi e veçantë për të parë nga afër lojtarët që kishte mbështetur dhe që i kishin qëndruar pranë gjatë një periudhe të vështirë.
Në hotelin e ekipit, Joni pati mundësinë të takonte nga afër futbollistët e Kombëtares. Por momenti më i veçantë do të vinte pak më vonë.
Para nisjes së ndeshjes, Joni zbriti në fushë si shoqërues i Kristjan Asllanit.
Një vit më parë, gjithçka kishte nisur me një video-mesazh të thjeshtë, të dërguar për t’i dhënë kurajë një fëmije përpara një beteje të vështirë. Këtë herë, Joni ishte aty, në fushën e stadiumit, krah futbollistit që kishte kërkuar të dëgjonte në momentin kur kishte më shumë nevojë për mbështetje.
Një histori që tregon se lidhja mes futbollit dhe tifozëve mund të shkojë shumë përtej rezultatit të një ndeshjeje. Për Jonin, Kombëtarja nuk ishte thjesht një ekip për t’u mbështetur nga tribuna, por një burim shprese dhe një pjesë e rëndësishme e një udhëtimi të vështirë drejt rikuperimit.
View this post on Instagram
KOHA JONË SONDAZH
