Forcat amerikane pritet të tërhiqen nga bazat e tyre të fundit në Irak deri të mërkurën. Ky largim po festohet si fitore nga Irani dhe aleatët e tij, të cilët tashmë gëzojnë ndikim të madh në vendin ku humbën jetën 4,500 amerikanë gjatë më shumë se dy dekadave luftë.
Ekspertët irakianë të sigurisë thonë se tërheqja – për të cilën u ra dakord në vitin 2024 nën presidencën e Joe Biden dhe që u zbatua nga administrata e Donald Trump-it, ndërkohë që ajo zhvillon luftë kundër Iranit – mund t'u japë Teheranit dhe aleatëve të tij të fuqishëm dorë të lirë, duke u mundësuar gjithashtu armiqve të tjerë të SHBA-së, përfshirë Shtetin Islamik, të rikthehen në skenë.
"Irani do të përfitojë në aspektin strategjik nga largimi i koalicionit, sepse kjo eliminon një prani ushtarake që për vite me radhë shërbente si kundërpeshë ndaj ndikimit të Teheranit në Irak," tha Jasim al-Bahadli, një analist irakian sigurie i specializuar në studimin e grupeve të armatosura shiite që mbështesin Iranin.
Ai parashikoi se milicitë pro-iraniane jo vetëm që do ta paraqisnin largimin si një fitore për lëvizjen e tyre, por edhe do të "përpiqeshin ta shndërronin atë vrull në një ndikim më të madh mbi vendimmarrjen politike dhe atë të sigurisë".
Abu Mojtaba al-Yasiri, një komandant i "Rezistencës Islamike në Irak", një grupim që përfshin fraksione të ndryshme të armatosura të mbështetura nga Irani e përshkroi tërheqjen amerikane si "një fitore historike për grupet e rezistencës islamike irakiane dhe irakianët e nderuar, si dhe një disfatë dërrmuese për projektin amerikan". Versus.al
