Administrata amerikane ka vënë në zbatim ndalimin e disa importeve nga Kanadaja, mes tyre pijet alkoolike, produktet e bulmetit dhe motoçikletat, duke e përshkallëzuar më tej luftën tregtare mes dy vendeve fqinje.
Të lidhura
None found
Vendimi i fundit i administratës Trump erdhi pasi Kanadaja vendosi në fillim të këtij muaji tarifa për një sërë mallrash amerikane, pas ndërprerjes së negociatave tregtare.
Kryeministri kanadez Mark Carney ka deklaruar se Otava nuk pritet të marrë masa të tjera hakmarrëse. Sipas tij, ndikimi i ndalimeve amerikane në ekonominë kanadeze do të jetë “modest”.
Ndërkohë, negociatat mes dy vendeve vazhdojnë të jenë të pezulluara. Përfaqësuesi amerikan i tregtisë, Jamieson Greer, i tha CNBC-së se Presidenti Donald Trump është “i kënaqur” me marrëdhëniet aktuale me Kanadanë.
“Ata na telefonojnë herë pas here dhe ne zhvillojmë biseda të mira rreth marrëveshjeve të mundshme. Por nuk ka urgjencë nga ana jonë,” u shpreh Greer.
Masa e shpallur të martën prek rreth 1 miliard dollarë kanadezë, ose 710 milionë dollarë, në eksporte të pijeve alkoolike drejt SHBA-së. Në listën e produkteve të ndaluara përfshihen edhe produktet e hirrës që përdoren në prodhimin e pluhurit proteinik.
Edhe eksportet e motoçikletave do të preken nga ndalimi. Megjithatë, sipas të dhënave kombëtare të Statistikave të Kanadasë, gjatë vitit 2025 Kanadaja dërgoi në SHBA vetëm rreth 5,000 motoçikleta, me vlerë afërsisht 120 milionë dollarë kanadezë, ndaj pasojat për këtë sektor pritet të jenë minimale.
Ndalimet u bënë publike për herë të parë nga Trump përmes një serie urdhrash ekzekutivë të firmosur më 8 shtator. Në këto dokumente, presidenti amerikan tha se masat ishin kundër “diskriminimit të vazhdueshëm” të Kanadasë ndaj produkteve amerikane të qumështit, automobilave dhe alkoolit.
Trump e akuzoi gjithashtu Kanadanë se “po i trajton Shtetet e Bashkuara shumë padrejtësisht”.
“Ata kanë qenë një nga vendet më të këqija në të gjithë botën”, deklaroi ai.
Carney kishte theksuar më herët se ndalimet ishin “masa relativisht modeste” krahasuar me veprimet e tjera tregtare të ndërmarra nga SHBA-të ndaj Kanadasë.
Megjithatë, kryeministri kanadez pranoi se bizneset dhe sektorët e goditur drejtpërdrejt do të përballen me pasoja.
Derek Holt, ekonomist në bankën kanadeze Scotiabank, shkroi në një analizë se “këto veprime janë për të shpëtuar fytyrën nga administrata amerikane, jo të natyrës substanciale dhe kjo është pozitive”.
Varësia e sektorit kanadez të pijeve alkoolike nga tregu amerikan është e lartë. Rreth 93% e eksporteve kanadeze të këtyre produkteve gjatë vitit 2025 u shitën në SHBA. Organizata Spirits Canada, e cila përfaqëson prodhuesit kanadezë të pijeve alkoolike, paralajmëroi se pasojat për industrinë “mund të jenë të rëndësishme”.
Ekonomistët dhe kompanitë kanë ngritur shqetësime edhe për pasigurinë që këto vendime mund të krijojnë lidhur me të ardhmen e marrëdhënieve tregtare të Kanadasë me SHBA-në, partnerin e saj më të madh ekonomik.
Përveç ndalimeve të reja, Shtetet e Bashkuara kanë vendosur tarifa prej 50% për një sërë produktesh kanadeze, përfshirë mallrat e qumështit, pijet alkoolike, çelikun dhe aluminin. Ndërkohë, për automjetet e prodhuara në Kanada aplikohet një tarifë prej 25%.
Si kundërpërgjigje, Kanadaja ka vendosur tarifa nga 15% deri në 50% për më shumë se 700 produkte amerikane, si dhe një taksë prej 25% për disa produkte çeliku dhe alumini. Shumica e provincave kanadeze kanë ndaluar gjithashtu shitjen e pijeve alkoolike amerikane.
