Presidenti i Emirateve të Bashkuara Arabe, Mohamed bin Zayed Al Nahyan, u takua me kryeministrin e Izraelit, Benjamin Netanyahu, në Abu Dhabi të dielën, njoftoi një agjenci zyrtare lajmesh e emiateve, duke konfirmuar raportimet e mëparshme të mediave izraelite për takimin. "Palët diskutuan marrëdhëniet dypalëshe midis Emirateve dhe Izraelit, si dhe mënyrat për t'i forcuar dhe zhvilluar ato," thuhej në një deklaratë të shkurtër. Kjo dukej se ishte hera e parë që Abu Dabi e pranonte zyrtarisht takimin. Të hënën, Izraeli njoftoi se Netanyahu kishte vizituar Emiratet e bashkuara Arabe një ditë më parë për të diskutuar mbi luftën me Iranin dhe çështjet rajonale. Vizita erdhi disa javë pas një raportimi bujshëm të mediave izraelite, sipas të cilit presidenti i Emirateve e kishte paralajmëruar Netanyahun para sulmit të udhëhequr nga Hamasi ndaj Izraelit më 7 tetor 2023, një informacion që kryeministri izraelit nuk ua kishte përcjellë shërbimeve të sigurisë. Netanyahu e ka mohuar këtë pretendim. Sipas mediave izraelite, Netanyahu udhëtoi drejt emirateve të dielën për t'i kërkuar Sheikut Mohamed të mohonte se i kishte dhënë atë paralajmërim në vitin 2023. Në maj, Emiratet e Bashkuara Arabe i kishin mohuar raportimet se Netanyahu e kishte vizituar fshehurazi vendin, pasi vetë zyra e Netanyahut kishte deklaruar se ai ishte takuar me presidentin e Emirateve gjatë luftës me Iranin. Abu Dhabi është një aleat kryesor i SHBA-së në rajon dhe një nga pak vendet arabe që kanë lidhje zyrtare me Izraelin, pas nënshkrimit të Marrëveshjeve të Abrahamit gjatë mandatit të parë të presidentit amerikan Donald Trump në vitin 2020. Dy vendet i forcuan marrëdhëniet gjatë konfliktit; sipas raportimeve, Izraeli dërgoi në Emirate sistemet e tij të mbrojtjes ajrore "Iron Dome", si dhe personelin për t'i operuar ato.