Te fundit
12 vite pas tragjedisë, Stallone rrëfen momentin kur humbi të birin: Nuk ishte njerëzore telefonata që mora...
29 Shtator 2026, 17:00Lifestyle
TEMA
Sylvester Stallone ka folur për dhimbjen e thellë që përjetoi pas humbjes së djalit të tij, Sage, i cili ndërroi jetë në moshën 36-vjeçare nga një atak në zemër.
Në një intervistë për The New York Times, aktori 80-vjeçar kujtoi momentin kur mori lajmin tragjik dhe mënyrën se si kjo humbje ndikoi tek ai.
Stallone tregoi se, edhe pse në ditët e para arriti të përballonte detyrimet dhe ceremoninë mortore, rreth një javë më vonë u përball me një shpërthim të fortë emocional.
“Kaloni nëpër shumë faza faji. Mendon: Çfarë mund të kisha bërë? A duhej të isha aty? Po sikur të kisha bërë këtë? Po sikur të kisha marrë rrugën djathtas në vend të majtas?”, rrëfeu ai.
Stallone kujtoi edhe telefonatën përmes së cilës mësoi për vdekjen e të birit. Sipas tij, telefonata ishte e papritur dhe e ftohtë.
“Burri i ri i nënës sime, të cilin nuk e kisha takuar kurrë dhe që ishte mjek, më telefonoi dhe më tha: ‘Sly, ai iku. Sage iku’. Unë i thashë: ‘Iku ku?’. ‘Vdiq. Iku. Më vjen keq’. Dhe e mbylli telefonin”, tregoi aktori.
Ditët e para pas humbjes, Stallone mendonte se po arrinte ta përballonte situatën. Por, pasi kaloi ceremonia mortore dhe u përpoq të vazhdonte jetën e përditshme, emocionet e mbledhura shpërthyen.
“Me funeralin, duke u kujdesur për nënën e tij dhe duke u përpjekur të vazhdosh jetën në të tashmen, gjithçka të çon në një botë krejt tjetër. Mendon: ‘Uau, po ia dal. Kur do të shpërthej?’. Dhe rreth një javë më vonë, isha krejt vetëm në dhomën time dhe nga brenda meje doli një britmë që nuk e kisha dëgjuar kurrë më parë, as para dhe as pas asaj dite. Ishte thjesht dhimbje, pikëllim dhe faj. Nuk ishte njerëzore”, u shpreh ai.
Aktori foli me shumë dashuri për djalin e tij, duke e përshkruar si “një djalë shumë të mirë”.
“Ai kishte një nënë të mrekullueshme. Mund të kishte bërë gjëra të mëdha në të ardhmen. Nuk e kisha idenë se kishte diçka që do të prisje të shfaqej tek një njeri shumë më i madh në moshë. Por jo, diçka të tillë nuk e kapërcen”, tha Stallone.
Sage Stallone, djali i Sylvester Stallone dhe ish-bashkëshortes së tij Sasha Czack, u gjet i pajetë në shtëpinë e tij në Los Angeles më 13 korrik 2012.
Marrëdhënia mes babait dhe djalit u shfaq edhe në ekranin e madh. Sage luajti rolin e Rocky Balboa Jr., djalit të personazhit të interpretuar nga Sylvester Stallone, në filmin Rocky V.
Më të lexuarat
24 oret e fundit
Javen e fundit
Blog Tema
Lini një Përgjigje