Edward Rukindi Kitzanangoma Nyabongo II, gazetar dhe ish-prezantues i televizionit publik të Ugandës, është shpallur mbreti i ri i mbretërisë tradicionale Toro. Ai zë vendin e kushëririt të ndjerë, Oyo Nyiba Kabamba Iguru Rukindi IV, i cili dikur u njoh si monarku më i ri në botë.
Të lidhura
None found
Kitzanangoma, 56 vjeç, u përzgjodh nga një komitet i posaçëm i ngritur për të përcaktuar pasardhësin. Rukindi IV vdiq në fund të gushtit në Shtetet e Bashkuara, në moshën 34-vjeçare, si pasojë e kancerit.
Rukindi IV mori kurorën kur ishte vetëm 3 vjeç, pas vdekjes së të atit. Në atë kohë, sipas Librit të Rekordeve Guinness, ai u bë monarku më i ri në botë.
Përzgjedhja e Kitzanangomës shkaktoi përçarje në familjen mbretërore. Nëna Mbretëreshë, Best Kemigisa, dhe vajza e saj, Princesha Ruth Komundale, e kundërshtuan vendimin. Ato thanë se mbreti i ndjerë kishte një trashëgimtar, për të cilin, sipas tyre, dinte vetëm një rreth i ngushtë familjar.
Best Kemigisa dhe Princesha Komundale paraqitën gjithashtu një testament që caktonte “birin e tij biologjik” si pasardhës. Komiteti zgjedhor mbretëror u përgjigj se fëmija nuk ishte paraqitur asnjëherë para grupit prej 21 pleqsh dhe nuk kishte marrë pjesë në ceremonitë tradicionale të njohjes, të kërkuara për trashëgimtarët e fronit.
Komiteti shpjegoi se kandidati për trashëgimtar duhet të ketë arsimimin dhe përgatitjen e nevojshme për të marrë përsipër detyrat e udhëheqësit. Kështu, djali që pretendohet se ishte i Rukindi IV nuk u mor në konsideratë për fronin.
Mbretërimi i Edward Rukindi Kitzanangoma Nyabongo II filloi në mesnatën e së hënës. Të martën, pas një beteje të simuluar, ai mori pallatin mbretëror në Fort Portal, si pjesë e një ceremonie tradicionale që zgjati 24 orë.
Gjatë ceremonive në Fort Portal, kryeqytetin e Toro-s, mbreti i ri theri një dem dhe derdhi gjakun e një pule. Më pas, ai përshkoi në këmbë më shumë se 4 kilometra deri te pallati mbretëror.
Toro bën pjesë në katër mbretëritë kryesore tradicionale të Ugandës. Në fund të shekullit XIX, ato u bashkuan për të krijuar protektoratin britanik të Ugandës. Mbretëritë u shpërbënë më 1967, por Presidenti Yoweri Museveni i riktheu në fillim të viteve 1990.
Kushtetuta e Ugandës sot ua kufizon mbretërive rolin në çështjet tradicionale e kulturore. Megjithatë, mbretërit vazhdojnë të kenë ndikim në komunitetet e tyre.
Edward Rukindi Kitzanangoma Nyabongo II besohet se i përket fisit Babito dhe është anëtar i familjes së gjerë të ish-mbretit George David Rukindi III. Sipas BBC-së, edhe emri Kitzanangoma dëshmon prejardhjen e tij mbretërore.
Ai lindi më 1970 në një fshat rreth 300 kilometra larg kryeqytetit, Kampala. Në vitin 1999 përfundoi studimet për Komunikim Masiv në Universitetin e Kampalës dhe më pas punoi mbi dy dekada në media, mes të tjerash si prezantues lajmesh në televizionin publik ugandas.
Pas më shumë se 20 vitesh në gazetari, Kitzanangoma tashmë ka nisur një kapitull të ri si udhëheqësi tradicional i mbretërisë së Toro-s.
