Autoritetet e Estonisë deklaruan se shërbimet speciale të Rusisë kanë urdhëruar zjarrvënien në ambientet e kompanisë së mbrojtjes Milrem Robotics, në Talin. Kompania prodhon dhe furnizon Ukrainën me automjete ushtarake pa pilot.
Të lidhura
None found
Ngjarja ndodhi gjatë natës mes 14 dhe 15 gushtit. Kryeministrja e Estonisë, Kristen Michal, tha se hetimet kanë çuar në përfundimin se pas sulmit qëndrojnë shërbimet speciale ruse, por nuk bëri publike prova të tjera në mbështetje të këtij vlerësimi.
Ministri i Jashtëm estonez, Margus Tsahkna, u shpreh se të dhënat e siguruara nga Shërbimi i Sigurisë së Brendshme të Estonisë, Kapo, japin bazë për ta cilësuar zjarrin si “një akt sabotimi të urdhëruar nga shërbimet speciale të Federatës Ruse”.
Tre të dyshuar u arrestuan në Letoni dhe u ekstraduan në Estoni në fillim të këtij muaji. Sipas autoriteteve estoneze, ata dyshohet se janë autorët e sulmit.
Drejtoresha e Kapo-s, Margo Palloson, tha se të arrestuarit janë shtetas letonezë, të cilët kishin jetuar në Rusi dhe ishin përfshirë edhe në incidente të mëparshme.
Palloson deklaroi se Moska po kërkon në mënyrë të vazhdueshme njerëz që mund të realizojnë operacione sabotimi në Evropë. Megjithatë, ajo theksoi se rasti ndaj Milrem Robotics ishte sulmi i parë i suksesshëm i këtij lloji që autoritetet estoneze ia atribuojnë Rusisë gjatë këtij viti.
Sipas Kapo-s, Rusia po shqyrton mundësi të reja për kryerjen e sabotimeve dhe veprimeve të tjera armiqësore në shtetet evropiane.
Shefja e shërbimit estonez paralajmëroi se personat e rekrutuar për këto misione mund të manipulohen ose të mashtrohen për objektivin e vërtetë të veprimeve që ndërmarrin.
Tsahkna e vendosi incidentin në kuadër të një fushate më të gjerë ruse në Evropë.
“Ky akt sabotimi është pjesë e fushatës më të gjerë të Rusisë në të gjithë Evropën, që synon të na frikësojë dhe të dobësojë mbështetjen tonë për Ukrainën”, tha ministri i Jashtëm estonez.
Akuzat e Talinit u mbështetën edhe nga disa aleatë evropianë. Presidenti i Francës, Emmanuel Macron, deklaroi se shtimi i veprimeve armiqësore përfaqëson, sipas tij, një përshkallëzim të rrezikshëm.
Macron iu referua gjithashtu incidentit të gushtit në aeroportin e Leipzigut, në Gjermani, ku pranë avionëve të mallrave ukrainas u gjet një dron i mbushur me eksploziv.
“Rusia duhet ta dijë se nuk do ta mposhtë unitetin tonë apo vendosmërinë tonë për të vazhduar mbështetjen ndaj Ukrainës”, u shpreh presidenti francez.
Një zëdhënës i Bashkimit Evropian tha se BE-ja do të vijojë ndihmën për Ukrainën. Edhe Sekretari i Përgjithshëm i NATO-s, Mark Rutte, u bëri thirrje vendeve të Evropës të ruajnë qetësinë dhe të mos ndërpresin mbështetjen për Kievin.
Rutte tha se Rusia po zhvillon ndaj vendeve anëtare të NATO-s një fushatë veprimesh armiqësore, e cila synon të dobësojë mbështetjen për Ukrainën.
Kremlini i ka hedhur poshtë akuzat për përfshirje në sulm. Dmitry Peskov, zëdhënësi i presidentit rus Vladimir Putin, i cilësoi deklaratat e Estonisë si të pabazuara dhe të shkëputura nga realiteti.
“Ne nuk mundemi dhe nuk do t’i marrim seriozisht deklarata të tilla”, tha Peskov.
