Transportet e naftës përmes Ngushticës së Hormuzit janë rritur dhe aktualisht kanë arritur në 65–70% të niveleve të regjistruara para luftës, sipas kompanisë së të dhënave energjetike “Vortexa”.

Kjo shifër përfshin të gjitha produktet e naftës, përfshirë gazin e lëngshëm (LPG) dhe produktet e rafinuara, si benzina. Ndërkohë, krahasuar me periudhën para luftës, rreth 80% e naftës bruto dhe kondensateve po kalojnë aktualisht përmes ngushticës, sipas “Vortexa”.

Sipas kompanisë, mesatarja javore e transportit ka qenë 11,2 milionë fuçi naftë bruto në ditë, një shifër që ishte raportuar më herët edhe nga “Wall Street Journal”.

Edhe analistja Amena Bakr nga kompania e të dhënave “Kpler” ka raportuar një rikuperim të eksporteve të naftës nga Gjiri.

Të dhënat e “Kpler” tregojnë se prodhuesit kryesorë të Lindjes së Mesme eksportuan 12,8 milionë fuçi naftë në ditë gjatë shtatorit, krahasuar me 18,8 milionë fuçi në ditë në shkurt.

Veprimet ushtarake dhe kërcënimet e Iranit kanë penguar ndjeshëm qarkullimin përmes ngushticës që nga fillimi i sulmeve amerikane dhe izraelite ndaj Iranit në fund të shkurtit.

“Vortexa” ia atribuon një pjesë të rritjes së transportit të energjisë që nga fundi i korrikut zgjerimit të të ashtuquajturës “flotë shuttle”.

Analistë dhe media amerikane kanë raportuar se cisternat e mbrojtura nga Marina amerikane po lëvizin përpara-mbrapa përmes ngushticës, duke transportuar naftë nga terminalet e ngarkimit në Gjirin Persik drejt cisternave që presin jashtë ngushticës.

Sipas “Vortexa”, në rritjen e eksporteve po kontribuon gjithashtu shtimi i dërgesave të naftës nga Arabia Saudite.