Trump urdhëron qeverinë federale të zëvendësojë ‘inteligjencën artificiale’ me ‘superinteligjencë’

Presidenti i SHBA-së, Donald Trump, nënshkroi të martën një urdhër ekzekutiv duke i udhëzuar qeverisë federale të zëvendësojë termin “inteligjencë artificiale”, i cili zakonisht shkurtohet si “IA”, me “superinteligjencë” ose “SI”, në komunikimet zyrtare të degës ekzekutive.

Urdhri u drejtohet departamenteve dhe agjencive federale që të përdorin termat “super inteligjencë” dhe “SI” në korrespondencën zyrtare, komunikimet publike, dokumentet e politikave dhe materiale të tjera jo-statutore. Agjencitë udhëzohen gjithashtu që të ndalojnë përdorimin e termave “inteligjencë artificiale” dhe “IA” në këto materiale.

Urdhri udhëzon Ndihmësin e Presidentit për Shkencën dhe Teknologjinë që të zhvillojë një përkufizim federal të propozuar të “superinteligjencës” dhe “SI” që pasqyron “kufirin teknologjik në përparim të vazhdueshëm”.

Zyrtari ka gjithashtu detyrën të identifikojë çdo veprim shtesë ekzekutiv të nevojshëm për të zbatuar përkufizimin e propozuar.

Shtëpia e Bardhë tha se ndryshimi i terminologjisë synon të njohë “mundësinë e jashtëzakonshme” që paraqesin teknologjitë në zhvillim.

Sipas administratës, SHBA-të janë lider botëror në superinteligjencë dhe duhet të përdorin terminologji që pasqyron aftësitë dhe potencialin e teknologjive që po zhvillohen.

Administrata e përshkroi SHBA-në si vendlindjen e inteligjencës artificiale dhe tha se vendi ka udhëhequr zhvillimin dhe vendosjen e teknologjisë për më shumë se 70 vjet që kur inteligjenca artificiale u bë një fushë kërkimi.