Vijojnë negociatat SHBA-Iran në Doha, mosmarrëveshje për planin 7-ditor

Pavarësisht klimës pesimiste për mundësinë e arritjes së një marrëveshjeje, kontaktet mes Shteteve të Bashkuara dhe Iranit vijojnë, me ndërmjetësimin e Katarit.

Ministri i Jashtëm iranian, Abbas Araqchi, dhe delegacioni i tij u takuan të martën në mbrëmje në Doha me ndërmjetësit nga Katari.

Gjatë takimit, Araqchi mori përgjigjen e SHBA-së ndaj propozimit iranian për një plan 7-ditor, të cilin pritet ta diskutojë në Teheran të mërkurën.

Sipas burimeve të cituara nga Reuters, mosmarrëveshja kryesore mes palëve nuk lidhet me elementët e planit, por me rendin në të cilin do të zbatohen hapat.

Dokumenti parashikon një periudhë shtatëditore për ndërtimin e besimit dhe rikthimin te një version i zgjeruar i memorandumit të mirëkuptimit të nënshkruar mes SHBA-së dhe Iranit në qershor.

Plani kërkon “ndryshime themelore” përpara se të mund të ketë përparim. Diskutimet tashmë janë përqendruar te mënyra e zbatimit, cila palë do të bëjë hapin e parë dhe çfarë garancish do të ofrohen.

Katari shpreson për përparim

Katari ka shprehur shpresën se përpjekjet diplomatike do të prodhojnë rezultate konkrete, pavarësisht deklaratave të presidentit amerikan Donald Trump.

Zëdhënësi i Ministrisë së Jashtme të Katarit, Majid al-Ansari, tha se puna për takimet dhe shkëmbimin e mesazheve mes palëve vazhdon, me synimin për të gjetur një terren të përbashkët dhe për të arritur një marrëveshje që do të shmangte pasojat e konfliktit.

Ndërkohë, Trump ka mohuar raportimet se ishte i gatshëm të lehtësonte sanksionet ndaj Iranit apo të lironte fondet iraniane të bllokuara në këmbim të lëshimeve në programin bërthamor.

Përmes platformës Truth Social, Trump deklaroi se raportimet ishin të pavërteta dhe se nuk i kishte ofruar Iranit asgjë.