Zyrtari i FBI kërkesë hakerave: Na kontaktoni, e dini si të na gjeni…zgjedhja në duart tuaja!

Një zyrtar i lartë i FBI-së i ka bërë një kërkesë jashtëzakonisht publike grupit të hakerëve ShinyHunters, duke u thënë kriminelëve kibernetikë të martën se duhet të kontaktojnë autoritetet, pas një sulmi të gjerë ndaj faqes së internetit të byrosë për vendet e punës.

Në një video-mesazh të publikuar në X të martën, ndihmësdrejtori i FBI-së, Brett Leatherman, tha se arrestimi i fundit i një shtetasi holandez në lidhje me hetimin ndaj ShinyHunters, duhet të shërbejë si një paralajmërim.

“Grupe të tjera besonin se anonimiteti ose miqtë e tyre do t’i mbronin, dhe ata gabuan,” tha Leatherman, i cili drejton Divizionin Kibernetik të FBI-së. “Ju e dini si të na gjeni, dhe ne e dimë si t’ju gjejmë. Ju sugjeroj të kontaktoni ju të parët, ndërkohë që zgjedhja është ende në duart tuaja.”

Edhe pse e formuluar si një kërcënim, kërkesa e Leatherman për të hapur një kanal komunikimi midis autoriteteve të zbatimit të ligjit dhe hakerëve është treguesi më i fundit se sa seriozisht po e trajton byroja këtë sulm, i cili ka komprometuar të dhëna të ndjeshme mjekësore, numra të Sigurimeve Shoqërore, informacione mbi familjarët dhe detaje të lidhura me inteligjencën për punonjës të identifikuar të FBI-së.

Një memorandum i brendshëm i shpërndarë në të gjithë FBI-në thoshte se zyrtarët po vepronin mbi supozimin se çdo punonjës ishte ekspozuar, siç ka raportuar më parë Reuters.

ShinyHunters nuk iu përgjigj menjëherë një kërkese për koment. Grupi fillimisht i dha byrosë një javë kohë për të tërhequr një njoftim paralajmërues për hakerët, ndaj të cilit ShinyHunters kishte kundërshtime — një periudhë që përfundoi të martën.

Hakerët kanë thënë më pas se ultimatumi nuk ishte një afat apo kërcënim dhe se nuk kishin ndërmend t’i publikonin të dhënat.

“E gjithë kjo ishte një fushatë marketingu,” tha grupi të hënën./ Reuters.