Rregulla të reja/ S’ka burg për veprat me dënim nën 5 vite dhe nënat me fëmijë nën 6 vjeç

Këtë të mërkurë u prezantuan projektvendimet për ndryshimet në Kodin e Procedurës Penale.

Kryeministri Edi Rama, i pranishëm në prezantim, u ndal te disa prej ndryshimeve.

Ndër to, Rama theksoi se për veprat me dënim maksimal nën 5 vjet, nuk do të caktohet më arrest me burg.

Gjithashtu, nuk do të ketë masë sigurie 'arrest në burg' për nënat me fëmijë nën 6 vjeç apo për baballarët kujdestarë.

“Për veprat me dënim maksimal nën 5 vjet, nuk do të caktohet më arrest me burg. As heshtja e personit, as mospranimi i akuzës s’do të përdoren më si provë rrezikshmërie. Rreziku duhet të jetë konkret. Gjykata duhet të bëjë vlerësimin e pavarur dhe, nëse kopjon argumentet e prokurorit, vendimi bëhet i pavlefshëm dhe lind përgjegjësia disiplinore e gjykatësit. Sa herë caktohet arrestimi, gjykata duhet të vlerësojë edhe garancinë pasurore. Nuk do të ketë 'arrest në burg' për nënat me fëmijë nën 6 vjeç apo për baballarët kujdestarë”,-tha ndër të tjera Rama./CNA