Prokuroria e Tiranës njoftoi të mërkurën më 29 shtator përfundimin e hetimeve dhe dërgimin për gjykim të një çështjeje penale në ngarkim të ish-administratorit të Shoqërisë së Parë Financiare të Zhvillimit, FAF sh.a.; ish-kryetares dhe ish-anëtarëve të Këshillit Mbikqyrës, të cilët akuzohen për shpërdorim detyre në procedurat e prokurimeve. FAF, që akutalisht ka emërtimin Agrokredit sh.a., është një institucion financiar e zotëruar plotësisht nga Ministria e Financave dhe me degë në gjithë Shqipërinë, që ofron kredi për individë dhe biznese të vogla.
Procedimi penal për këtë çështje është filluar bazuar në të dhënat e evidentuara prej Kontrollit të Lartë të Shtetit në disa procedura prokurimesh. Nga hetimet ka rezultuar se procedurat e ndjekura për blerjen e një automjeti, janë realizuar pa miratimin e Ministrit të Financave. Po ashtu, në dosje nuk është gjetur argumentimi i kritereve të veçanta për kualifikim, në kundërshtim me ligjet në fuqi.
Për këto paligjshmëri është ngarkuar me përgjegjësi ish-administratori i FAF, Dashamir Qeli; ish-kryetarja e Këshillit Mbikqyrës, Ilda Malile; si dhe gjashtë anëtarët e tjerë të këtij këshilli.
Sipas prokurorisë, nga hetimet ka rezultuar gjithashtu, se automjeti i blerë ka qenë në pronësi të ish-kryetares së Këshillit Mbikqyrës, Ilda Malile, e cila ka mbajtur më parë dhe funksionin e sekretares së Përgjithshme në Ministrinë e Shëndetësisë.
“Hetimet arritën në përfundim se mjeti i blerë nga FAF sh.a., me vendimin e asamblesë në vlerën 1 600 000 lekë me tvsh, që do zëvendësonte punën e 6 mjeteve, nuk mund të përmbushte nevojat për 30 degët në 30 rrethe të Shqipërisë të kompanisë. Po kështu dhe caktimi i një vendi shtesë pune për shofer për këtë mjet të sapoblerë, kur ishin tashmë 6 shoferë të tillë, pa mjete dhe që mernin rrogat, ishte i tepërt dhe në kundërshtim të hapur me ligjin”, vlerëson Prokuroria e Tiranës.
