E PLOTË-Nga dënimet te kontrolli i telefonit/ Paketa e re e Kodit të Procedurës Penale, ja çfarë ndryshon

Ndryshimet e prezantuara këtë të mërkurë për Kodin e Procedurës Penale përfshijnë një sërë rregullash të reja në drejtësi.

Kryeministri Edi Rama, i pranishëm në prezantimin e sotëm, ndau detaje nga ndryshimet që përmbajnë mbi 100 nenet e hartuara nga ekspertë të fushës nga Italia dhe Franca.

Sipas projektvendimit, nuk do të caktohet dënim me burg për personat në gjendje të cenueshme, përfshirë personat e sëmurë, shtetasit mbi 70 vjeç dhe kujdestarët e fëmijëve pa prindër.

Ndryshime të mëdha pritet të vendosen edhe ndërmjet mbrojtjes dhe akuzës.

Rama tha se me ndryshimet e reja, avokati duhet të ketë të drejtë të kryejë veprimet e veta dhe të kërkojë ekspertë.

“Materialet e avokatit do t'i paraqiten gjyqtarit njëjtë si ato të prokurorisë. Po ashtu do të marrë pa pagesë materialet. Prokurori i një shteti demokratik ka për mision të zbulojë të vërtetën, jo vetëm të gjejë fajtor”,-theksoi kryeministri.

Ndryshimi i tretë lidhet me shtetasit që thirren në prokurori apo polici në çfarëdo cilësie do të ketë të shkruar që mund të paraqitet me avokat. Për herë të parë shkruhet se deklarimet e marra nën torturë janë absolutisht të papërdorshme.

Ndryshimi i katërt në Kodin e Procedurës Penale lidhet me sekuestrimin e pajisjes telefonike, që nuk mund të ketë një leje të pakufishme për të parë se çfarë përmban.

“Telefoni mund të sekuestrohet, por për ta hapur duhet vendim i gjykatës, ku do të përcaktohen aplikacionet që do të hapen, kategoria e të dhënave. Çdo e dhënë e marrë përtej autorizimit nuk është e vlefshme. E njëjta edhe për përgjimet. Duhet të transkriptohen vetëm ato që janë me vlerë për hetimin”,-tha Rama.

Ndryshimi i pestë lidhet me procedimin, që me projektvendimin e ri duhet të regjistrohet kur prokurori merr dijeni për veprën, jo kur të mundet. Hetimet e fshehura apo të mbajtura në sirtar për vite nuk mund të jenë rutinë në një shtet të së drejtës. Prokurori duhet të tregojë pse çështja mund të përfundojë në dënim.

Ndryshimi i gjashtë nxjerr prezumimin e pafajësisë jashtë sallës së gjyqit dhe e bën standard për institucionet. Prokurori, oficeri, avokati, i cili ka detyrim të ruajë sekretin, por e shkel atë, duhet të mbajë përgjegjësi.

Sipas Ramës, përgjegjësia nuk bie më mbi median, por mbi atë që e nxjerr detajin nga dosja.

Paketa e re e Kodit të Procedurës Penale forcon mbrojtjen e viktimës. Për dhunën në familje dhe krimet seksuale krijohen masa të reja, si largimi i autorit nga banesa jo më pak se 1,000 metra dhe me mbikëqyrje elektronike. Mbrohet identiteti i viktimës dhe mjetet e tyre për të marrë pjesë në proces./CNA