Rusia përqendron sulmet ndaj objekteve energjetike ukrainase/ Sulmet ajrore vrasin disa persona

Një sulm rus me raketa dhe dronë vrau të paktën katër njerëz, përfshirë një fëmijë, në Kiev dhe në rajonin përreth, njoftuan autoritetet ukrainase të mërkurën.

Një fëmijë u gjet i vdekur nën rrënoja pas një tjetër sulmi me raketa dhe dronë ndaj rajonit të Kievit në Ukrainë, tha të mërkurën guvernatori Tymur Tkachenko në "Telegram".

Shtëpi private, depo, makina dhe objekte infrastrukturore u dëmtuan në gjithë rajonin, ndërsa u raportua edhe për zjarre, tha ai.

Presidenti Volodymyr Zelensky reagoi pas atij që e cilësoi si një “sulm të vështirë”, me gati 190 dronë sulmues, si dhe raketa balistike që shënjestruan kryeqytetin.

“Objektivi kryesor ishte infrastruktura energjetike në kryeqytet dhe në rajonin e Kievit. U dëmtuan gjithashtu edhe ndërtesa banimi”, tha ai në një postim në rrjetet sociale.

Forcat Ajrore të Ukrainës thanë se Rusia e sulmoi Ukrainën gjatë natës me disa raketa balistike dhe 188 dronë, ndërsa rajoni i Kievit ishte shënjestra kryesore.

Ashpërsimi i sulmeve

Rusia ka ashpërsuar sulmet ndaj kryeqytetit ukrainas, duke kryer sulme të njëpasnjëshme me raketa dhe dronë, përfshirë edhe gjatë ditës.

Ministria e Mbrojtjes e Rusisë e pranoi të mërkurën se forcat e saj kryen “sulm masiv me përdorimin e armëve me saktësi të lartë me rreze të gjatë veprimi dhe dronëve sulmues”, duke goditur atë që e përshkroi si një qendër komunikimi dhe infrastrukturë energjetike që mbështet prodhimin ushtarak në Kiev dhe rajonin përreth.

Moska ka përdorur gjithnjë e më shumë dronë me motor reaktiv në sulmet ndaj Ukrainës, duke bërë që Kievi dhe disa qytete të tjera ukrainase të përballen me sulme me dronë pothuajse gjatë gjithë kohës.

Sulmi i 28 shtatorit, i cili vrau të paktën nëntë njerëz dhe plagosi më shumë se 80 të tjerë, ishte një nga shembujt e fundit të ashpërsimit të sulmeve, sipas zyrtarëve ukrainas.

Forcat ruse goditën ndërtesa banimi, zyra, qendra të të dhënave dhe Akademinë Kombëtare të Shkencave në qendër të Kievit gjatë një sulmi të kryer ditën.

Sipas Administratës Ushtarake të Qytetit të Kievit, 12 njerëz janë vrarë dhe rreth 200 janë plagosur në sulmet ruse ndaj Kievit gjatë javës së fundit.

Sulmet pasuan një javë përpjekjesh diplomatike në OKB për të sjellë përparim në bisedimet për t'i dhënë fund pushtimit në shkallë të plotë të Ukrainës nga Rusia, i cili tani ka hyrë në vitin e pestë.  /REL