Telefoni i sekuestruar Ergys Agasit pas ndalimit të tij në zonën e “Plepave” në Durrës është kthyer në një prej elementëve të rëndësishëm të hetimit të SPAK.
Bëhet fjalë për një iPhone 17, i cili nuk kishte të vendosur kod sigurie. Kjo ka bërë të mundur që oficerët e BKH-së dhe prokurorët e SPAK të kryejnë këqyrjen e aparatit dhe të marrin të dhëna nga përmbajtja e tij.
Sipas burimeve të cituara në raportim, në telefon janë gjetur komunikime me ish-drejtuesen e SHISH, Vlora Hyseni, si dhe biseda me persona të tjerë, mes tyre drejtues policie dhe prokurorë të SPAK.
Në aparatin e sekuestruar dyshohet se janë gjetur edhe dhjetëra komunikime me persona të shpallur në kërkim nga SPAK në qytete të ndryshme të vendit, përfshirë Tiranën, Durrësin, Vlorën, Fierin, Elbasanin dhe Fushë-Krujën.
Sipas raportimit, një pjesë e këtyre komunikimeve ishte ruajtur në mënyrë të qëllimshme në telefon. Në disa prej bisedave përmenden edhe persona të identifikuar në raportim si pjesëtarë të grupeve kriminale.
Hetuesit kanë gjetur gjithashtu komunikime ku përmenden drejtorë policie dhe prokurorë të SPAK, ndërsa përmbajtja e tyre po analizohet në kuadër të hetimit.
Telefoni i Agasit nuk ka qenë pajisja e vetme e sekuestruar. Gjatë kontrollit në banesën e tij janë gjetur edhe tre celularë të tjerë, duke e çuar në katër numrin total të aparateve të sekuestruara.
Ndërkohë, dy telefona të tjerë i janë sekuestruar Uljan Shpatarakut, i cili ndodhej në automjet me Agasin. Sipas raportimit, këto pajisje kanë qenë të mbrojtura me kode sigurie dhe ende nuk janë hapur nga ekspertët kibernetikë të SPAK.
Të dhënat e celularëve janë tashmë në fokus të hetimit të Prokurorisë së Posaçme, ndërsa komunikimet po verifikohen për të përcaktuar lidhjet dhe kontaktet mes personave të ndryshëm të përfshirë në dosje.
Në kuadër të hetimit, sipas raportimeve, është vendosur masa e arrestit në shtëpi ndaj Vlora Hysenit, ndërsa është kontrolluar banesa e ish-drejtorit të Policisë së Shtetit, Ilir Proda, dhe janë marrë në pyetje disa drejtues të lartë të policisë.
Mes personave që, sipas raportimeve, janë nën hetim përfshihen Ergys Agasi, Daniel Shima, Ermal Beqiri, Vlora Hyseni, Mirlinda Karçanaj, Gëzim Hoxha, Andis Papa, Elison Jorxhi, Hava Delibashi, Emirton Suli, Embro Sulejmani dhe Fatjon Kalluçi, ndërsa hetimi vijon./Syri
