Ministria e Jashtme e Izraelit reagon pas incidentit në fluturimin Dubai–Izrael: Përpjekje për të rrëmbyer avionin

Ministria e Jashtme e Izraelit ka reaguar pas incidentit të regjistruar sot në fluturimin Dubai–Izrael, duke e cilësuar ngjarjen si një përpjekje për rrëmbimin e avionit, në të cilin ndodheshin 172 persona, 169 prej tyre izraelitë.

Në reagimin e saj, ministria e ka lidhur incidentin me një seri sulmesh që i përshkruan si akte terroriste xhihadiste kundër Izraelit. Sipas saj, fakti që në incident u përfshinë një kompani ajrore nga Emiratet e Bashkuara Arabe dhe pasagjerë izraelitë nuk ishte i rastësishëm.

Deklarata e plotë:

Lidhur me incidentin e sotëm që përfshiu fluturimin Dubai – Izrael në përpjekjen për rrëmbimin e avionit me 172 persona në bord, 169 prej të cilëve izraelitë – ky është një rast që i shtohet një sërë akteve terroriste xhihadiste kundër Izraelit.

Izraeli vazhdon të jetë në shënjestër të sulmeve. Është vendi më i sulmuar në botë. Këtë herë, në një mënyrë që të kujton ngjarjet e 11 shtatorit.

Nuk është rastësi që u zgjodh një kompani ajrore nga Emiratet dhe pasagjerë izraelitë. Kjo ishte një përpjekje për të goditur partnerët kryesorë të paqes dhe të Marrëveshjeve të Abrahamit.