Takimi Rama-Von der Leyen/ Zbardhen diskutimet, nga Zvërneci te kapitujt e negociatave

Kryeministri Edi Rama mbajti fjalën e tij pas pritjes në Kryeministri të Presidentes së Komisionit Europian, Ursula von der Leyen.

Në një konferencë për shtyp, Rama u ndal te fokusi i bisedimeve me Von der Leyen, që sipas tij ishte në disa çështje me rëndësi për vendin.

Rama dhe Von der Leyen bashkëbiseduan mbi situatën e Zvërnecit, fazën e mbylljes së kapitujve të integrimit, ndërsa është paracaktuar se muaji dhjetor është vendimtar.

Kryeministri tha se gjatë takimit u trajtua edhe çështja e investimit në Zvërnec, që pasoi me protesta prej më shumë se 4 muajsh në Tiranë e që vijojnë ende.

Fjala e Ramës:

Sapo kemi përfunduar një bashkëbisedim me pjesën e parë të vizitës së Presidentes Von der Leyen në Tiranë, është gjithmonë kënaqësi dhe privilegj i vecantë që ta presim Presidenten këtu në Shqipëri, tanimë edhe në këtë tur tradicional të rajonit.

Nuk e di arsyen pse ky tur fillon gjithmonë nga Tirana, por dua të besoj që fillon nga A. Dhe besoj po ashtu që përsëri edhe këtë herë, me vizitën në Tiranë të presidentes dhe delegacionit të saj, ka shumë përmbajtje pozitive në raport me objektivat e përbashkët që kemi. Ndërkohë që unë dua të konfirmoj edhe njëherë edhe publikisht në këtë rast vullnetin tonë të hekurt për të çuar përpara të gjitha punët e një procesi që tanimë ka hyrë në fazën e mbylljes së kapitujve, përgatitemi për të filluar nga mbyllja e kapitujve së shpejti, para fundit të këtij viti dhe më pas për të vazhduar vitin e ardhshëm intensivisht me një pjesë të konsiderueshme të kapitujve të hapur.

Nga ana tjetër, dua të them se më vjen shumë mirë që edhe në një program të posaçëm të kësaj periudhe, programi i planit të rritjes, ne kemi arritur të kapim disa objektiva jashtëzakonisht ambiciozë dhe sic thashë me siguri, presidentja do ta prekë këtë temë, pasi është një nga risitë e mandatit të saj të dytë dhe risi që për rajonin ka ardhur si një mbështetje shumë e madhe, jo thjesht në aspektin financiar, por në aspektin e atij që quhet tanimë si një integrim gradual që gjithçka të vijë në fund të procesit.

Në fund, dua të bëj me dije se e kam informuar presidenten e Komisionit qoftë për ecurinë e projektit të madh të investimit që ka shkaktuar aq shumë interes, po e quaj, për të mos i vënë asnjë fjalë tjetër, ku tani jemi në fazën që presim së shpeti studimin e thelluar mjedisor, por ndërkohë, duke e informuar në lidhje me hapat që kemi hedhur në funksion të rritjes së konsiderueshme të transparencës me publikun edhe të ndërveprimit të qeverisë me publikun përmes mjeteve të reja të teknologjisë, në ditët e ardhshme do të ndezim Pasqyrën me transparencën e plotë të të gjithë dokumenteve dhe procesit sa i takon gjithçkaje që është e shkruar e zeza mbi të bardhë dhe projektin e shumë diskutuar.

Kemi folur edhe për bilancin e përpjekjes madhore në luftën kundër krimit të organizuar dhe korrupsionit, pikë e palëvizshme e agjendës tonë, dhe kemi bashkarisht konstatuar se tanimë është e qartë për Shqipërinë se nëse deri dje Komisioni ishte sistemi, sot sistemi po e lufton korrupsionin./CNA