Pasagjerët izraelitë të fluturimit të kompanisë “Flydubai”, i cili ishte nisur drejt Tel Avivit dhe kreu një ulje emergjente në Arabinë Saudite mëngjesin e sotëm, janë nisur drejt Izraelit me një fluturim riatdhesimi.
Sipas agjencisë izraelite të lajmeve TPS, avioni pritet të mbërrijë në aeroportin “Ben Gurion” të Tel Avivit rreth orës 18:00, me orën lokale. Në aeroport kanë mbërritur edhe familjarë të pasagjerëve për të pritur të afërmit e tyre.
Megjithatë, disa prej pasagjerëve kanë refuzuar të hipin në fluturimin e riatdhesimit të “Flydubai”, duke deklaruar se kanë frikë të udhëtojnë sërish me një avion të së njëjtës kompani. Ata kanë thënë se prisnin një fluturim të organizuar nga autoritetet izraelite.
Kryeministri izraelit Benjamin Netanyahu ka reaguar për ngjarjen, duke vlerësuar pasagjerët dhe anëtarët e ekuipazhit që ndihmuan në situatën e krijuar në bord.
“U shpreh mirënjohje heronjve në bord të fluturimit nga Dubai, të cilët treguan gatishmëri, guxim dhe iniciativë”, deklaroi Netanyahu, duke shtuar se u kishte dhënë udhëzime strukturave të sigurisë që të përgatiteshin për çdo kërcënim të mëtejshëm.
Sipas Netanyahut, piloti nga Omani është arrestuar dhe po merret në pyetje nga autoritetet saudite. Kryeministri tha se incidenti nisi pasi njëri prej pilotëve sulmoi me thikë pilotin tjetër dhe dyshohet se tentoi të shkaktonte rrëzimin e avionit.
Më tej, Netanyahu deklaroi se një pasagjer, së bashku me një anëtar të ekuipazhit, arriti të hynte në kabinën e pilotimit dhe të neutralizonte pilotin, ndërsa ky i fundit dyshohet se po tentonte të ndërhynte në sistemet e avionit. Sipas tij, më pas një tjetër anëtar i ekuipazhit ndihmoi në stabilizimin e avionit.
Kompania “Flydubai” ka deklaruar se rrethanat e konfliktit të ndodhur në kabinën e pilotimit të fluturimit FZ 1073 mbeten të paqarta dhe janë objekt i një hetimi zyrtar.
“Në këtë fazë fillestare, shkaqet dhe motivet që qëndrojnë pas ngjarjes janë të panjohura dhe mbeten objekt i një hetimi zyrtar. Ftojmë të gjitha palët të përmbahen nga spekulimet e parakohshme ndërsa autoritetet rindërtojnë faktet”, tha një zëdhënës i kompanisë.
Ndërkohë, Netanyahu ka zhvilluar një vlerësim të situatës me krerët e sigurisë izraelite pas incidentit. Zyra e kryeministrit publikoi një fotografi të tij gjatë bisedës me Këshilltarin për Sigurinë Kombëtare, Shmuel Ben Ezra, dhe Sekretarin Ushtarak, gjeneralmajor Guy Markizeno.
Sipas dëshmive të pasagjerëve të raportuara nga mediat izraelite, dy pilotë që ndodheshin në pjesën e pasme të avionit ndihmuan në uljen emergjente në Arabinë Saudite. Njëri prej pasagjerëve, Almog Itali, tha se ata ishin pilotë zëvendësues që pritej të operonin një fluturim të mëvonshëm.
Itali deklaroi se njëri prej tyre ishte britanik, ndërsa tjetri evropian, pa specifikuar kombësinë. Ai tha se detajet e sakta të incidentit në kabinë mbeten ende të paqarta, ndërsa autoritetet vijojnë hetimet për të përcaktuar se çfarë ka ndodhur gjatë fluturimit.
Mëngjesin e sotëm, një nga pilotët u godit me thikë nga shoku i tij ndërsa aeroplani filloi të humbasë me shpejtësi lartësinë dhe në bord filloi paniku.
Kështu u shndërrua në një emergjencë fluturimi i Flydubai nga Dubai në Tel Aviv , me mbi 150 pasagjerë në bord.
Faktet mbeten të paqarta dhe autoritetet në vendet e përfshira po përpiqen të kuptojnë se çfarë ka ndodhur. Ajo që dihet me siguri është se avioni fillimisht transmetoi kodin e përgjithshëm të emergjencës 7700, pastaj 7500, duke sinjalizuar një rrëmbim të mundshëm, gjë që bëri që avionët luftarakë izraelitë të ngriheshin në ajër. Dihet se avioni, ndërsa ndodhej në hapësirën ajrore jordaneze, devijoi drejtimin për në Arabinë Saudite, ku edhe u ul.
Ndryshe nga raportimet e mëparshme se një pilot rus dhe një bashkëpilot ukrainas po e fluturonin avionin, një pilot indian dhe një omani thuhet se ishin në kontroll.
Flydubai konfirmoi se ndodhi një "grindje në kabinë", shkaku dhe motivi i së cilës janë ende të panjohura dhe është nën hetim. Një deklaratë zyrtare nga Aeroporti Tabuk në Arabinë Saudite, ku u ul avioni i Flydubai, deklaroi se të dy "morën lëndime dhe u dërguan në spital për trajtimin e nevojshëm mjekësor"./Versus.al
