Alarm mjedisor në Tiranë/ Lana pushtohet nga plehrat dhe inertet

Vetëm pak kilometra larg Tiranës, një tjetër problem mjedisor vijon të rëndohet çdo ditë. Në dalje të kryeqytetit, përtej zonës së “Pallatit me Shigjeta”, rreth 1.8 kilometra përgjatë lumit janë kthyer në një zonë të mbushur me inerte dhe mbeturina.

CNA ka monitoruar nga afër situatën në terren. Nga pamjet e siguruara nga CNA evidentohet qartë që në të dyja anët e lumit, mbetjet urbane dhe inertet janë grumbulluar në sasi të mëdha, duke zënë hapësirat përreth shtratit të lumit dhe duke ndryshuar rrjedhën natyrore të ujërave.

Por problemi nuk është vetëm estetik. Pavarësisht kësaj problematike të madhe, që prej kohësh rëndon mbi mjedisin dhe komunitetin e zonës, qeveria dhe institucionet përgjegjëse nuk kanë marrë masa konkrete për zgjidhjen e situatës.

Situata bëhet edhe më problematike gjatë muajve të dimrit, kur reshjet e shumta dhe bllokimi i shtratit nga mbetjet sjell daljen e ujërave nga shtrati, duke rrezikuar banorët dhe mjedisin.

Gjatë periudhave me reshje intensive, situata bëhet edhe më shqetësuese. Ujërat e zeza, inertet dhe mbeturinat e depozituara pranë shtratit pengojnë rrjedhën e ujit, duke rritur rrezikun e përmbytjeve.

Në dimër, kur prurjet e lumit shtohen, uji del nga shtrati dhe përhapet në zonat përreth.

Përveç rrezikut të përmbytjeve, grumbullimi i mbetjeve dhe shkarkimi i ujërave të ndotura përbëjnë një problem serioz mjedisor.

Grumbullimi i mbetjeve dhe ujërave të zeza krijon kushte të papërshtatshme higjieno-sanitare, me rrezik potencial për shëndetin e banorëve që jetojnë pranë zonës.

Ekspertët e mjedisit e konsiderojnë menaxhimin e mbetjeve dhe mbrojtjen e shtratit të lumenjve një çështje të rëndësishme për parandalimin e ndotjes dhe të përmbytjeve./ CNA