Pete Davidson rrëfen periudhën e errët të varësisë: Ishte e frikshme! Ndihesha nën ndikimin e drogës edhe kur nuk përdorja

Aktori dhe komediani amerikan Pete Davidson ka folur hapur për betejën e tij me varësinë nga droga, duke rrëfyer se përdorimi i substancave kishte arritur në një pikë që e frikësonte edhe atë vetë.

Në një intervistë për Variety, 32-vjeçari tha se situata u përkeqësua pasi nisi të përjetonte ndjesinë e të qenit nën ndikimin e drogës edhe kur nuk kishte konsumuar substanca.

“Filloi të bëhej e frikshme sepse nuk ndihesha më sikur isha nën ndikimin e drogës. Ndihesha nën ndikimin e drogës kur nuk isha, kështu që mendova: ‘Ky është një problem i madh’”, rrëfeu Davidson.

Ai tregoi se, në periudhën më të rëndë të varësisë, përdorte ketaminë, LSD, kërpudha halucinogjene dhe oksid azoti, ndërsa konsumonte rregullisht marihuanë dhe pilula.

Sipas Davidson, periudha më e vështirë erdhi në verën e vitit 2023, pas publikimit të serialit autobiografik “Bupkis”, në të cilin ai luante një version të vetes. Në të njëjtën periudhë kishte kaluar rreth një vit nga largimi i tij nga “Saturday Night Live”, duke bërë që jeta e tij e përditshme të mos kishte më të njëjtën strukturë.

Komediani tha se përfshirja në një projekt ku duhej të rikthehej vazhdimisht te përvojat e tij personale dhe momentet e vështira kishte ndikuar negativisht tek ai.

Davidson shpjegoi se përdorimi i substancave ishte kthyer në një mënyrë për të mpirë dhimbjen dhe për t’u përballur me atë periudhë.

Një bisedë me nënën e tij, Amy, përmes FaceTime-it, rezultoi vendimtare për të. Sipas tij, ajo i tha se frika e saj më e madhe ishte të zgjohej një mëngjes dhe të mësonte nga lajmet se diçka e keqe i kishte ndodhur të birit.

“Arrita në një pikë ku nuk mund t’ia bëja më këtë”, tha Davidson.

Pas kësaj, ai u regjistrua në një qendër rehabilitimi dhe vendosi të largohej nga “Bupkis”, pavarësisht se seriali i platformës Peacock ishte rinovuar tashmë për një sezon të dytë.

Davidson pranoi se projekti kishte bërë që ai të vazhdonte të ekspozonte jetën e tij personale.

“Isha pjesë e problemit që urreja më shumë, që ishte ky pushtim i jetës sime personale. Në thelb po e ushqeja atë dhe po vazhdoja të njëjtën rrëfim”, u shpreh ai.

Komediani tregoi se kishte qenë në rehabilitim edhe më parë, por këtë herë e mori më seriozisht vendimin për të qëndruar esëll.

“Duhet ta dëshirosh vërtet. Dhe kur të kesh mbaruar, ke mbaruar”, tha ai, duke folur për procesin e rikuperimit.

Davidson tha se aktualisht është esëll dhe nuk përdor më drogë. Sipas tij, kanë kaluar dy ose tre vjet nga hera e fundit që përdori substanca të tjera dhe rreth një vit ose më shumë që kur la edhe marihuanën.

“Çuditërisht, gjëja më e vështirë nga të gjitha ishte lënia e marihuanës”, tha ai.