Emisioni “Stop” transmetoi këtë të mërkurë, më 30 shtator, rastin e qytetarit Eduart Peposhi, i cili i është drejtuar emisionit “Stop”, pas sekuestrimit të hotelit 5-katësh “Central Park”, në kuadër të një hetimi të ndjekur nga prokurorja e Sarandës, Hava Memko.
Hetimi kishte nisur për vëllain e tij, Kujtim Peposhi, lidhur me punime në një objekt të vjetër, të identifikuar në dokumente me numër pasurie 3/191. Por gjatë verifikimeve në terren, përmendet hoteli “Central Park”, me numër pasurie 3/195.
Familja thotë, se hoteli ka dokumente pronësie dhe leje ndërtimi në emër të Skënder Peposhit, ndërsa Bashkia Sarandë konfirmon, se Prokuroria ka kërkuar dokumentacion vetëm për pasurinë 3/191 dhe për Kujtim Peposhin.
Avokati Arben Llangozi ngre pikëpyetje mbi procedurën, duke argumentuar, se qytetari duhej të pyetej dhe të paraqiste dokumentet. Sipas tij, gjykata ka hequr masën e sigurimit personal dhe pritet të kërkohet edhe heqja e sekuestros së hotelit.
“Stop” u drejtua në zyrën e urbanistikës në bashkinë Sarandë
Gazetarja: Nga prokuroria, ju është kërkuar për një leje ndërtimi, për cilin numër pasurie? Pra, që ka të bëjë me familjen Peposhi?
Punonjësi: Për pasurinë 3/191, zona kadastrale 2297, Ksamil.
Gazetarja: Dhe ju keni kthyer përgjigje, që nuk ka asnjë leje ndërtimi për këtë numër pasurie. Ndërkohë, ju e keni depozituar lejen e ndërtimit të hotelit 5-katësh?
Punonjësi: Jo, sepse nuk na është kërkuar nga prokuroria. /tvklan.al
