Dështon edhe kandidati i tretë për kryeministër/ Rumania përballë zgjedhjeve të parakohshme

Kriza politike në Rumani po zgjatet, pasi kandidati për kryeministër Siegfried Muresan nuk arriti të marrë votëbesimin në parlament. Muresan siguroi 182 vota, ndërsa i nevojiteshin 233, duke u bërë kandidati i tretë i propozuar nga presidenti Nicusor Dan që dështon të sigurojë shumicën, pas rënies së qeverisë së koalicionit pro-europian rreth pesë muaj më parë.

Rezultati hap mundësinë për një skenar të ri politik, ku Aleanca për Bashkimin e Rumunëve (AUR), forcë e së djathtës që kundërshton disa prej politikave të BE-së, NATO-s dhe ndihmës për Ukrainën, mund të kërkojë një shumicë qeverisëse me Social-Demokratët (PSD). Një zhvillim i tillë ka ngritur shqetësime për ecurinë e konsolidimit fiskal, pasi Rumania ka deficitin buxhetor më të lartë në Bashkimin Europian në raport me madhësinë e ekonomisë.

Presidenti Dan mund të bëjë përpjekje të tjera për të gjetur një kandidat që siguron shumicën parlamentare, ndërsa zgjedhjet e parakohshme mbeten një mundësi, megjithëse ai i ka cilësuar vazhdimisht si opsionin e fundit. Pasiguria politike po ndiqet me vëmendje edhe nga tregjet dhe agjencitë e vlerësimit të kreditit, të cilat e konsiderojnë miratimin e buxhetit për vitin 2027 dhe uljen e mëtejshme të deficitit si faktorë kyç për ruajtjen e vlerësimit sovran të Rumanisë në kategorinë “investment grade”.