“Ermal raketën” nuk e shpëton skandali i Vlora Hysenit dhe Ergys Agasit

Nënkryetari i Partisë Demokratike, Belind Këlliçi, ka hedhur akuza të forta ndaj ministrit të Mbrojtjes, Ermal Nufi, të cilin e quan me nofkën “Ermal Raketa”.

Këlliçi deklaron se ministri nuk ka dhënë ende shpjegime për akuzat për trafikun e armëve, ndërsa nga ana tjetër shfaqet në Lushnje për skandalin me rezervuarin.

Sipas nënkryetarit të PD-së, ministri duhet të bëjë transparencë mbi raportet e tij me Ron Yeffet, si dhe mbi pretendimet që lidhen me prodhimin dhe shitjen e armëve në zonat e konfliktit.

“Prej 3 javësh nën akuza të rënda, Ermal Raketa shfaqet pas skandalit të Vlora Hysenit në një rezervuar fshati…!

Prej fillimit të muajit, Ministri i Mbrojtjes, Ermal Nufi, i njohur si Ermal Raketa, është nën akuza të rënda, si ndihmës i koordinatorit të Edi Ramës për punët e pista, Ron Yeffet, dhe i dyshuar për trafik ndërkombëtar armësh.

Edhe pse kanë kaluar 3 javë, Ermal Raketa nuk ka dhënë asnjë shpjegim.

Por ai ka gjetur guximin të shfaqet sot në një rezervuar në Lushnje ku po ndodh një krim mjedisor. Dhe madje ka folur për masat që po merrte ushtria!

I fshihet akuzave për krime shumë të rënda, dhe nxjerr krye në një rezervuar fshati.

Asyeja pse Ermal Raketa u shfaq pas 3 javësh errësirë, është shpresa e tij se skandali i Vlora Hysenit do të ketë ndikuar që të harrohet skandali i armëve. Këto janë ato pak momente çliruese që provojnë bashkëpunëtorët e Edi Ramës të zhytur në afera, kur një gjë edhe më e rëndë ndodh. Ata marrin oksigjen dhe kurajo të dalin në publik.

Sidoqoftë, Ministri i Mbrojtjes duhet ta dijë mirë se akuzat ndaj tij qëndrojnë dhe do të ndiqen nga PD deri në fund. Ai duhet të bëjë transparencë se cilat janë raportet e tij me Ron Yeffet dhe çfarë armësh prodhohen këtu që shiten në zonat në luftë.

Nuk e shpëton dot Ermal Raketën as skandali i Vlora Hysenit, i Gys Agasit, i Belinda Ballkut, as ai që pritet në vijim nga regjisori austriak ku pritet të mësohen rryshfetet e mëdha të inceneratorëve”, shkruan Këlliçi./ CNA