Cristiano Ronaldo ka munguar përsëri në seancën stërvitore të Portugalisë, për të tretën ditë radhazi. *A’Bola” bëri të ditur se kapiteni i skuadrës u largua nga stadiumi “Parken” në Kopenhagë me një furgon të Federatës, ndërsa të gjithë shokët e tij të skuadrës, me përjashtim të Francisko Konseisaos, ndodheshin në fushë.
Gazeta portugeze publikoi në rrjet videon e momentit kur Ronaldo doli nga stadiumi dhe u drejtua te një furgon i zi, i shoqëruar nga dy anëtarë të stafit të FPF-së.
Në një konferencë për shtyp të mbajtur pak minuta më parë, Zhorge Zhezus kishte siguruar se Ronaldo do të ishte në fushë në “Parken”.
“Ai nuk refuzoi të stërvitej dje. Francisko Konseisao nuk u stërvit sepse ishte i dëmtuar; Feliks jo, sepse po përpiqeshim të menaxhonim lodhjen; ndërsa Kris bëri ushtrime në palestër. Ai do të stërvitet sot. Është dita e katërt, kështu që do të stërvitet”, tha trajneri i cili ishte takuar me Ronaldon të martën në mbrëmje
Ai minimizoi situatën, por theksoi autoritetin e tij. “Mund të premtoj çfarë të dua. Unë jam trajneri. Unë jam trajneri; i thashë lojtarit se nuk do ta niste ndeshjen si titullar. ‘Po të vendos në stol. Nëse më duhesh për 30 minuta, do të luash; nëse jo, nuk do të luash.’ Asnjë lojtar nuk do t’i ndryshojë kurrë idetë e mia. As ai, as kushdo tjetër në futboll. Madje asnjë president. Kurrë, zero”
Por Kristiano Ronaldo nuk hyri në fushë për stërvitjen, ndryshe nga e marta në Malmo të Suedisë, kur kishte kaluar një kohë të konsiderueshme në fushë para se të fillonte seanca stërvitore. Sulmuesi 41-vjeçar u kthye në hotelin e skuadrës me një furgon të Federatës Portugeze të Futbollit.
Deri më tani, nuk ka asnjë shpjegim zyrtar për mungesën e Ronaldos në seancën stërvitore të së mërkurës.