Vetëm 13% e pjesëtarëve të rinjve të Brezit Z thonë se shumicës së njerëzve mund t’u besohet, ndërsa 74% mendojnë se “nuk mund të jesh kurrë tepër i kujdesshëm”, sipas një analize të politologut Ryan Burge nga Washington University në St. Louis.
Brezi Z do të jetë brezi me nivelin më të ulët të besimit në historinë moderne amerikane, shkruan Burge. Për krahasim, 24% e brezit të Mijëvjeçarëve, 30% e brezit X dhe 29% e brezit “baby boomers” mendojnë se shumicës së njerëzve mund t’u besohet.
Mungesa e besimit po reflektohet edhe në vendin e punës. Brezi Z ka hyrë në tregun e punës në një periudhë të karakterizuar nga pandemia, puna në distancë, proceset e automatizuara të rekrutimit, pushimet e shpeshta nga puna dhe pasiguria e vazhdueshme.
Sipas një sondazhi të Workday për vitin 2026, punonjësit e brezit Z kanë 16 herë më shumë gjasa se ata të brezit X të thonë se nuk u besojnë kolegëve.
Ndërkohë, vetëm 41% e punonjësve të rinj thanë se i besojnë punëdhënësit të tyre, sipas një sondazhi të Indeed në vitin 2025, krahasuar me rreth 65% të Mijëvjeçarëve dhe 71% të “baby boomers”.
Një studim tjetër i GenHQ tregoi se 47% e brezit Z kanë lënë një punë për shkak të mungesës së besimit te drejtuesit, ndërsa 45% do të pranonin një ulje page prej 10% për të punuar për një shef të cilit i besojnë plotësisht.
Në këtë klimë kanë ndikuar edhe përvojat në tregun e punës.
Shumë të rinj kanë parë prindërit e tyre të punojnë deri në rraskapitje dhe më pas të humbasin vende pune që i kishin mbajtur për vite.
Kjo i ka bërë më skeptikë ndaj besnikërisë ndaj kompanisë dhe më të prirur të kërkojnë ekuilibër mes punës dhe jetës private.
Edhe procesi i punësimit po e thellon problemin.
Raporti “Job Seeker Nation 2026” i Employ tregon se 32% e aplikantëve thonë se kompanitë kanë ndërprerë komunikimin me ta pa shpjegim gjatë procesit të rekrutimit.
Mungesa e besimit mund të ndikojë edhe te produktiviteti.
Sipas Gallup, angazhimi i punonjësve ka rënë në nivelin më të ulët që nga viti 2020, duke sjellë humbje të vlerësuara në rreth 10 trilionë dollarë nga produktiviteti i munguar.
Ekspertët argumentojnë se besimi ndërtohet gradualisht.
Punëdhënësit mund të ndihmojnë duke njohur kontributin e punonjësve, duke mbajtur premtimet dhe duke shpjeguar më qartë vendimet që ndikojnë tek ata.
Besimi ndërtohet gjatë një serie të gjatë ndërveprimesh me njerëzit e tjerë, thotë Burge. / Monitor
