Bojkoti ndaj rregullores së GJKKO, dështon sërish gjyqi ‘Meta’! Avokatët gjobë 5 mijë lekë (të rinj), kreu i PL: Situata me porosi të Agasit që të më penalizojnë (VIDEO)

TIRANË- Ka dështuar për të tretën herë radhazi në GJKKO procesi ndaj ish-presidentit Ilir Meta dhe bashkëshortes së tij Monika Kryemadhi. Pas dy shtyrjeve për shkak të mungesës së gjyqtares Palloi, ketë herë shkak është bërë bojkoti i avokatëve kundër rregullores censuruese të GJKKO-së së shkallës së parë.

Ndonëse ishin në sallën e gjyqit, avokatët deklaruan se nuk mund të përfaqësojnë të akuzuarit për shkak të bojkotit. Si Meta ashtu edhe Kryemadhi kërkuan që procesi të vijonte edhe pa mbrojtësit e tyre ligjore, por prokurorët kundërshtuan, pasi sipas tyre vepra për të cilën akuzohen të pandehurit nuk lejon gjykimin pa avokatë.

Trupi gjykues vendosi te gjobisë avokatin e Metës Bujar Musta dhe Esmeralda Ramën, përfaqësuese e Kryemadhit me nga 5 mijë lekë të rinj, duke e quajtur të pajustifikuar mungesën e tyre. Siç ka ndodhur në çdo rast Metës iu pezulluan afatet e paraburgimit, deri në 15 tetor kur u la seanca e radhës.  

Ky vendim ngjalli reagimin e ish presidentit. Meta u shpreh se konflikti është i stisur sipas tij nga shokët e Ergys Agasit, ndërsa i vetmi që po penalizohet është ai.

Një reagim të ngjashëm pati edhe jashtë seancës edhe Sekretari i Përgjithshëm i Partisë së Lirisë Tedi Blushi, i cili tha se megjithëse ka kërkuar ndërhyrjen e kuvendit për konfliktin nuk ka asnjë përgjigje

"Skandali i këtij procesi të fëlliqur tanimë ka dalë në dritë të diellit, që është një proces fund e krye kriminal dhe politik ndaj presidentit të Partisë së Lirisë, liderit të forcës së dytë opozitare, i cili u rrëmbye në mënyrë mafioze nga Ergys Agasi, nga Ilir Proda, nga Vilson Bala dhe gjithë banditët dhe kaçakët e bandave të Durrësit dhe të Elbasanit, me urdhër të Edi Ramës. Standardet e këtij rrëmbimi, të cilat janë identike edhe me standardet e hetimit, janë identike me standardet e paraburgimit në kushte çnjerëzore, në kushtet e një persekucioni të qëllimshëm politik, janë të njëjtat edhe me standardet e një procesi, e theksoj, të fëlliqur, një procesi politik, i cili në fakt sot faktoi dyshimin e arsyeshëm se i gjithë i ashtuquajturi konflikt mes GJKKO-së së Shkallës së Parë dhe Dhomës së Avokatisë është imponuar nga shokët, miqtë e Ergys Agasit, vetëm për t’i pezulluar në mënyrë të pandershme, të paligjshme, antikushtetuese afatet e paraburgimit zotit Meta, i cili vijon ende të qëndrojë në burg, por ndërkohë shteti nuk i njeh asnjë ditë burg.

Ky ishte dhe qëndrimi që mbajti Meta dhe dua t’ju theksoj se fakti që edhe Kuvendi i Shqipërisë vijon të heshtë mbi një kërkesë të bërë prej më shumë se një jave, që i kam drejtuar në cilësinë e kryetarit të grupit parlamentar të Partisë së Lirisë, në cilësinë e anëtarit të Komisionit të Ligjeve, në mënyrë që Kuvendi të ndërhyjë menjëherë për zgjidhjen e këtij konflikti nëpërmjet angazhimit, siç e përcakton Rregullorja e Kuvendit, të Komisionit të Ligjeve dhe të Komisionit të Mbikëqyrjes Institucionale, pra për angazhimin e dy të ashtuquajturve “baballarë të reformës në drejtësi”, Ulsi Manjës dhe Fatmir Xhafës, ende sot nuk kemi një përgjigje.", tha Blushi. 

Edhe Kryemadhi deklaroi se kjo situatë po penalizon mbi ata, që duan të vijojnë betejën me drejtësinë.

"Nuk mund të penalizosh, po themi, Ilir Metën për bojkotin e avokatëve. Nëse bojkoti i avokatëve është vendim i ligjshëm apo i paligjshëm, pra vendimi që ka marrë Dhoma e Avokatisë, a ka një institucion të drejtësisë që të japë një vendim nëse ky vendim është i ligjshëm apo i paligjshëm? Të njëjtën gjë ngriti edhe avokatja ime në seancë. Tha: “Zoti gjyqtar, kur ju u thirrët nga Gjykata e Lartë në Konferencën e Gjyqtarëve, gjykata e shtyu për një javë më vonë seancën dhe nuk iu pezulluan afatet zotit Meta”. Dhe në këtë rast, qoftë avokati i zotit Meta, qoftë edhe avokatja ime, e cila ishte në sallë, nuk është se po mungojnë për arsye personale.

Kush do të vijë në sallat e gjyqit për të na mbrojtur nëse avokatët nuk paraqiten? Sepse edhe avokatët e gatshëm janë në bojkot, edhe avokatët e ndihmës juridike janë përsëri në bojkot. Në rastin konkret, kush do të vijë të na mbrojë ose të jetë prezent? Ne po mbrohemi vetë. Më revolton sepse unë kërkova një javë më shumë. Pra, që seanca e radhës të ishte pas një jave për një arsye timen shëndetësore dhe u ndjeva e përdorur kriminalisht në këtë drejtim, sepse përdorimi i shtyrjes u bë për t’i shtuar dhe pezulluar masat e zotit Meta dy javë", tha Kryemadhi. 

Procesi është në fazën e kërkesave paraprake ku prokuroria e posaçme duhet të japë qëndrimin e saj në lidhje me kërkesat e bëra si nga Meta dhe Krymadhi për pavlefshemëri dhe papërdorshmëri të provave.

SI.E./E.H/Shqiptarja.com

TAG:
• Ilir Meta
• rregullorja e GJKKO
• GJKKO