Koçeku: Qeveria ka harruar shqiptarët në Serbi, vetëm marrëveshje të mbrapshta me Beogradin

Deputetja Marjana Koçeku ka ndarë sot një reagim lidhur me daljen me një listë të përbashkët të kandidatëve shqiptarë në zgjedhjet e tetorit në Serbi.

Koçeku shkruan në një postim në rrjetin social “Facebook” se bashkimi i 8 subjekteve politike i gjen shqiptarët në Serbi më të bashkuar se kurrë.

Koçeku u shpreh me nota kritike se çështjet e shqiptarëve në Serbi ngrihen rrallëherë nga qeveria shqiptare, veç marrëveshjeve të mbrapshta, siç e cilësoi rastin e Konsullatës Serbe në Shkodër.

Reagimi i plotë:

Filmimet që kanë dalë këto dy ditë nuk përbajnë lajm. Lajm asht që partitë shqiptare në Serbi janë ba bashkë. Por kjo temë nuk mori as vëmendjen ma minimale dhe u mbyt prej zhurmës së krijueme të lajmeve boshe.

Tetë subjekte politike u bashkuen për me garu në nji listë të vetme, “Koalicioni Shqiptar”, në zgjedhjet parlamentare të 25 tetorit në Serbi, kundër regjimit autokratik të Vuçiç. Këto zgjedhje vijnë si pasojë e presionit të protestave disa mujore dhe i gjejnë shqiptarët ma të bashkuem.

Qeveria jonë as reagoi e as e mbështeti nji akt të tillë vendimtar për përfaqësimin që u bahet shqiptarëve në Serbi. Rrallëherë ngrihet çështja e tyne edhe në takime të diplomacisë shqiptare, përveçse kur bahet fjalë për marrëveshje të mbrapshta siç ishte rasti i konsullatës serbe në Shkodër.

Shqiptarët në Serbi përveçse shtypen prej vitesh sidomos si pasojë e spastrimit me mjete administrative, nuk marrin as mbështetjen e meritueme nga qeveria e Shqipërisë.

Qeveria e Kosovës çdo vit e ka rrit me nga 1 milion euro mbështetjen për shqiptarët në Serbi. Po qeveria jonë, interesat e kujt mbron atje?/CNA