Pa transport drejt Tiranës pas orës 16:00/ Qytetarët e Korçës për CNA: Nevojë për linja edhe në mbrëmje

Mungesa e linjave të transportit publik drejt Tiranës në orët e pasdites dhe të mbrëmjes mbetet një problem për qytetarët e Korçës dhe zonave përreth.

Sipas orareve të transportit, autobusi i fundit nga Korça drejt kryeqytetit niset rreth orës 16:00, duke lënë pa një alternativë të rregullt udhëtimi të gjithë ata që kanë nevojë të lëvizin pas këtij orari.

Për qytetarët, kjo situatë bëhet veçanërisht problematike në rastet kur puna, një vizitë mjekësore apo një angazhim tjetër përfundon në orët e vona të pasdites. Në këto raste, alternativat mbeten kryesisht automjetet private, taksitë apo furgonët e porositur, kostoja e të cilëve është ndjeshëm më e lartë.

Qytetarët thonë për CNA se nevoja për një linjë të mëvonshme është e lidhur edhe me raste urgjente, veçanërisht për personat që kanë familjarë në spitale apo detyrime të tjera në Tiranë.

"Populli ka nevojë, ka të sëmurë, kanë njerëz nëpër spitale. E mira është që të ketë autobusë. Prish shumë punë. Është shumë e vështirë në këtë kohë. Nga një anë kanë të drejtë (shoferët), se nafta ka vajtur në kulm",-tregon një qytetar. 

Kostoja e një udhëtimi individual është një tjetër shqetësim i ngritur nga qytetarët. Sipas tyre, një taksi apo furgon i porositur për një udhëtim Korçë–Tiranë mund të kushtojë shumë më tepër se bileta e transportit publik, duke e bërë të papërballueshëm udhëtimin për shumë persona.

"Mirë është të ketë, dhe Tirana le të ketë. Shumë mirë se njerëzit kanë halle, s'dihet se kur merr një telefonatë a një gjë. Gjithë bota edhe në orët e vona ka transport, vetëm në Shqipëri bëhet një çikë problem",-shprehet një qytetare. 

Edhe qytetarë të tjerë e konsiderojnë të nevojshëm shtimin e linjave të transportit, duke theksuar se njerëzit duhet të kenë mundësi të lëvizin edhe pas orarit të fundit të autobusëve. Megjithatë, sipas tyre, një linjë deri në orët e vona të pasdites mund të ishte e mjaftueshme, pasi më vonë kërkesa mund të jetë më e ulët.

Mungesa e transportit pas orës 16:00 mbetet kështu një pengesë për qytetarët që kanë nevojë të udhëtojnë drejt Tiranës jashtë orarit tradicional të linjave. Ndërsa kostoja e taksive dhe furgonëve të porositur mbetet e lartë, qytetarët kërkojnë që të shihet mundësia për të ofruar një alternativë transporti edhe në orët e pasdites dhe të mbrëmjes./CNA