Ish-liderja serbe e Bosnjës, Biljana Plavshiç ndërron jetë në Beograd

Ish-udhëheqësja serbe e Bosnjës Biljana Plavshiç, e cila u deklarua fajtore në një gjykatë të Kombeve të Bashkuara për persekutim si krim kundër njerëzimit për rolin e saj në mizoritë gjatë luftës në Bosnjë 1992-95, ka vdekur në kryeqytetin e Serbisë, Beograd. Ajo ishte 96 vjeç.

Plavsiç ishte një nga zyrtarët e lartë kryesorë serbo-boshnjakë që zbatoi një marrëveshje paqeje të nënshkruar në Dayton të Ohajos, ndërsa shërbente si presidente e entitetit politik serb të Bosnjës, Republika Srpska, menjëherë pas përfundimit të luftës.

Gjatë luftës ajo shërbeu në këshillin udhëheqës të serbëve të Bosnjës. E konsideruar nga zyrtarët perëndimorë si shumë më liberale se udhëheqësit e tjerë të serbëve të Bosnjës, ajo u bë një kundërshtare e zëshme e presidentit serb të Bosnjës gjatë kohës së luftës, Radovan Karaxhiç.

Megjithatë, ajo u padit në vitin 2000 nga gjykata e OKB-së për ish-Jugosllavinë me seli në Hagë me akuzat për gjenocid, krime lufte dhe krime kundër njerëzimit për rolin e saj të dyshuar në fushatën e kohës së luftës për të krijuar një entitet të veçantë serb në Bosnjë.

Ajo u dorëzua vullnetarisht për t’u përballur me drejtësinë në vitin 2001 dhe më vonë u deklarua fajtore për krimin kundër njerëzimit të persekutimit gjatë luftës. Akuzat e tjera u tërhoqën.

Ajo u dënua me 11 vjet burgim dhe u lirua në vitin 2009 pasi vuajti dy të tretat e dënimit të saj.

Vdekja e Plavshiç vjen vetëm disa javë pasi ish-shefi ushtarak serb i Bosnjës, Ratko Mlladiç, vdiq në paraburgim pasi u dënua për gjenocid dhe krime të tjera gjatë luftës në Bosnjë.

Përpara se të hynte në politikë ndërsa ish-Jugosllavia po shpërbëhej, Plavsiç ishte profesoreshë e shkencave natyrore dhe dekane e fakultetit në Universitetin e Sarajevës.

Që nga lirimi i saj nga burgu, Plavshiç ishte tërhequr nga jeta publike dhe jetonte në Beograd.