Pas vendimit të komisionit të pavarur, i cili e shpalli Manchester Cityn fajtor për një “skemë të kamufluar financimi” që dyshohet se i rriti artificialisht të ardhurat me rreth 1.053 miliardë euro gjatë viteve 2009-2018, klubet rivale po kërkojnë një dënim shumë më të ashpër sesa rënia për vetëm një sezon nga Liga Premier.
Të lidhura
None found
Sipas The Guardian, disa skuadra të Ligës Premier vlerësojnë se një sezon i vetëm në Championship nuk do të ishte masë e mjaftueshme për shkeljet e konstatuara.
“Rënia në Championship për një sezon do të ishte e pamjaftueshme. Komisioni duhet të arrijë në një dënim që është proporcional me vite të tëra mashtrimi të qëllimshëm dhe të vazhdueshëm, si dhe të shërbejë si një pengesë e fortë që diçka e tillë të mos përsëritet”, ka thënë një burim i një klubi për gazetën britanike.
Ndërkohë, Manchester United, Arsenal, Tottenham dhe Liverpool kanë rezervuar të drejtën për të ndërmarrë veprime ligjore ndaj Cityt për dëme të mundshme financiare.
Vendimi për sanksionin përfundimtar pritet të merret pas përfundimit të procesit të apelimit nga ana e Manchester Cityt.
Një seancë për përcaktimin e dënimit është planifikuar të mbahet më vonë, ndërsa pritet që vendimi të dalë deri në fund të janarit. Megjithatë, City mund të tentojë ta zgjasë edhe më tej procesin duke kundërshtuar afatet e përshpejtuara të vendosura nga Liga Premier.
Ky rast lidhet me precedentin e Burnleyt, i cili fitoi një dëmshpërblim prej rreth 41 milionë eurosh ndaj Evertonit për shkeljen e rregullave të Profitit dhe Qëndrueshmërisë Financiare (PSR).
