Përballja Finlandë-Shqipëri, caktohen arbitrat

UEFA ka caktuar arbitra nga Irlanda për ndeshjen Finlandë-Shqipëri që do të luhet të shtunën, me kryesor 35-vjeçarin Rob Hennessy.

Arbitri irlandez mban stemën e FIFA-s prej vitit 2017. Përveç ndeshjeve të kampionatit në Irlandë, gjatë këtij sezoni Hennessy ka drejtuar edhe dy sfida në Conference League.

Shqipëria vjen në këtë përballje pas dy fitoreve në ndeshjet e para të Nations League. Kuqezinjtë triumfuan fillimisht ndaj Bjellorusisë, ndërsa në ndeshjen e dytë fituan në transfertë kundër San Marinos.

Në anën tjetër, Finlanda e nisi Nations League me një fitore të thellë ndaj San Marinos, ndërsa më pas barazoi me Bjellorusinë.

Në historikun e përballjeve mes dy skuadrave, Finlanda ka avantazhin. Shqipëria dhe Finlanda janë përballur shtatë herë, me finlandezët që kanë regjistruar katër fitore. Një ndeshje është mbyllur në barazim, ndërsa dy takime janë fituar nga kuqezinjtë.

Tashmë të dyja skuadrat do të kërkojnë një rezultat pozitiv në përballjen e radhës, ndërsa vëmendja do të jetë edhe te arbitri irlandez Rob Hennessy, i cili do të vendosë drejtësinë në këtë sfidë.