Dy çmime në menu, rregulli i ri i detyrueshëm për restorantet bëhet VIRAL në rrjet!

Nga muaji tetor, klientët që ulen në restorante apo kafene në Kroaci do të shohin dy çmime pranë të njëjtit produkt. Nuk bëhet fjalë për një gabim në menu, por për një rregull të ri të detyrueshëm që synon të tregojë se sa janë rritur çmimet. Përveç çmimit aktual, bizneset duhet të shënojnë edhe të ashtuquajturin “çmim referencë”, pra çmimin që produkti kishte më 10 shtator 2026.

Kështu, nëse një kafe kushton aktualisht 4 euro, pranë saj mund të shfaqet edhe çmimi që kishte në datën e përcaktuar. Të dyja shifrat duhet të jenë qartësisht të dukshme. Qeveria kroate argumenton se masa do t’u japë konsumatorëve më shumë transparencë dhe do t’i ndihmojë të kuptojnë menjëherë nëse një produkt është shtrenjtuar.

Rregulli nuk vlen vetëm për menutë e printuara. Bizneset me faqe interneti duhet të publikojnë listat e çmimeve edhe në formate të lexueshme automatikisht dhe çdo ndryshim duhet të përditësohet deri në orën 08:00. Versionet e mëparshme duhet të qëndrojnë të publikuara për të paktën 30 ditë.

Edhe tabelat reklamuese me çmime jashtë lokaleve duhet të tregojnë çmimin referencë. Mosrespektimi i rregullave mund të sjellë gjoba, të cilat për disa kompani mund të arrijnë deri në 27 mijë euro. Por masa ka shkaktuar pakënaqësi te gastronomët.

“Gjëja e parë që do të shkaktojmë është konfuzion te klientët, sepse do të ketë dy çmime: një që paguajnë dhe një që nuk paguajnë”, tha Franz Letica, president i Shoqatës së Gastronomëve të Zagrebit. Pra, turistët që vizitojnë Kroacinë nga tetori nuk duhet të habiten kur të shohin dy çmime për kafenë, picën apo ushqimet e tjera. Çmimi që paguhet është ai aktual, ndërsa shifra tjetër shërben vetëm për krahasim.