Joao Felix e sheh Barcelonën si destinacionin e preferuar për rikthimin e tij në futbollin evropian, pasi kontrata me Al Nassr skadon më 30 qershor 2027.
Të lidhura
None found
Portugezi 26-vjeçar dëshiron të rikthehet në Evropë si futbollist i lirë. Sipas mediumit spanjoll Sport, përfaqësuesit e tij tashmë i kanë përcjellë Barcelonës mesazhin se sulmuesi është i gatshëm të luajë sërish në “Camp Nou”, pa i shkaktuar klubit katalunas shpenzime për kartonin e tij.
Për momentin, mes palëve nuk ka bisedime konkrete. Barcelona i ka të konsoliduara opsionet në repartin ofensiv, por një transferim pa pagesë për kartonin mund të shqyrtohet si mundësi gjatë verës së vitit 2027. Vendimi do të ndikohet nga forma e Felixit dhe planet e klubit për sezonin e ardhshëm.
Felix ka folur vazhdimisht për afërsinë që ndien me Barcelonën. Në një intervistë të fundit për AS, ai tregoi se aktivizimi me klubin katalunas kishte qenë ëndërr e tij që në fëmijëri. Sulmuesi po ashtu bëri të ditur se dëshiron të rikthehet në futbollin evropian dhe të luajë përsëri në Ligën e Kampionëve.
Gjatë sezonit 2023/24, ai luajti për Barcelonën në formë huazimi nga Atletico Madridi. Në 44 paraqitje zyrtare, portugezi realizoi 10 gola, por nuk arriti të bëhej pjesë e rregullt e formacionit të drejtuar nga Xavi Hernandez.
Pas përfundimit të huazimit, Barcelona nuk kërkoi zgjatjen e qëndrimit të tij dhe Felix u rikthye te Atletico Madridi. Më pas ai kaloi te Chelsea, i cili pagoi rreth 50 milionë euro, së bashku me bonuse, për transferimin e tij dhe i ofroi një kontratë afatgjatë.
Megjithatë, vetëm një vit pas transferimit në klubin anglez, Felix u largua dhe vazhdoi karrierën në futbollin saudit.
Al Nassr e mori sulmuesin në korrik të vitit 2025, duke i ofruar një marrëveshje dyvjeçare që zgjat deri në qershor të vitit 2027.
Që prej transferimit në Arabinë Saudite, Felix ka rikuperuar formën dhe efikasitetin ofensiv që i kishin munguar gjatë periudhës së tij të fundit në Evropë.
