Një situatë kritike është krijuar nga një zjarr masiv në fshatrat Galush dhe Gjevurtë, në Njësinë Administrative Përparim të bashkisë Peqin, ku flakët kanë përfshirë rreth 20 hektarë ullishte, pemëtore dhe sipërfaqe me shkurre.
Zjarri është përhapur me shpejtësi, duke krijuar vatra të mëdha, ndërsa situata në terren paraqitet aktualisht jashtë kontrollit.
Për përballimin e flakëve janë mobilizuar dhjetëra forca zjarrfikëse dhe mjete nga Peqini dhe bashkitë përreth. Në operacionin për shuarjen e zjarrit janë angazhuar edhe dy helikopterë, ndërsa ekipet në terren po punojnë intensivisht për izolimin e vatrave.
Prioriteti kryesor i forcave të emergjencës është mbrojtja e banesave dhe banorëve, pasi zjarri është përhapur në një sipërfaqe të konsiderueshme pranë zonave të banuara.
Era dhe terreni po e vështirësojnë ndërhyrjen, ndërsa zjarrfikësit po përpiqen të frenojnë përhapjen e flakëve dhe të krijojnë barriera për të shmangur afrimin e tyre drejt banesave.
Situata vijon të monitorohet nga strukturat e emergjencave, ndërsa ndërhyrja nga ajri dhe toka po vijon pa ndërprerje.