Policia ka dhënë informacionin për aksidentin e ndodhur pasditen e sotme në aksin Tapizë–Fushë-Krujë, ku humbi jetën një shtetas egjiptian.
Sipas njoftimit zyrtar, përplasja ndodhi rreth orës 16:50 në vendin e quajtur “Arrameras”, ku u përfshinë dy automjete, njëri me drejtues 44-vjeçarin K. C. dhe tjetri me drejtues 18-vjeçarin M. S.
Si pasojë e aksidentit, 22-vjeçari egjiptian E. A., i cili udhëtonte si pasagjer në automjetin e drejtuar nga 18-vjeçari, ka ndërruar jetë.
Ndërkohë, drejtuesi 18-vjeçar M. S. ka mbetur i dëmtuar dhe ndodhet në spital. Sipas Policisë, ai është jashtë rrezikut për jetën.
Pas aksidentit, në vendngjarje ka mbërritur grupi hetimor, i cili po vijon punën për të përcaktuar rrethanat e plota të përplasjes dhe shkakun e aksidentit.
