Kryeministri izraelit Benjamin Netanyahu po përdor të njëjtën strategji fushate që i ka shërbyer për dekada ndërsa përpiqet të ruajë pushtetin në zgjedhjet e muajit të ardhshëm, duke e paraqitur veten si i vetmi person që mund t'i mbajë izraelitët të sigurt në një rajon armiqësor.
Por, katër javë para zgjedhjeve, ai po përpiqet të shpëtojë reputacionin e tij si garantues i sigurisë, i cili u trondit rëndë nga sulmi i befasishëm i Hamasit në Izraelin jugor më 7 tetor 2023 – një nga dështimet më të mëdha të sigurisë në historinë e vendit. Zgjedhjet e 27 tetorit janë të parat në Izrael që nga dita më vdekjeprurëse dhe sulmi më i rëndë ndaj hebrenjve që nga koha e Holokaustit, i orkestruar nga një grup militant palestinez që e gjeti ushtrinë më të fuqishme të Lindjes së Mesme të papërgatitur.
"Sa u përket politikës së jashtme dhe sigurisë, situata është krejtësisht e ndryshme nga e kaluara, pasi z. Netanyahu e ka paraqitur veten si 'Z. Siguri' dhe si autoriteti kryesor në çështjet e diplomacisë dhe sigurisë kombëtare; mirëpo, ai mbikëqyri gjithashtu katastrofën më të rëndë të vendit në fushën e sigurisë – ndaj tani mbetet një pikëpyetje e madhe nëse ai mund të vazhdojë ta paraqesë veten para bazës së tij mbështetëse dhe koalicionit si lideri më kompetent për të udhëhequr vendin përpara në çështjet e sigurisë kombëtare".
"Netanyahu nuk dorëzohet" është slogani zyrtar i partisë së djathtë Likud të Netanyahut, për të cilën shumica e sondazheve parashikojnë se do të humbasë rreth një të tretën e vendeve të saj në parlament. Në fjalime dhe video të shkurtra të fushatës, Netanyahu i portretizon rivalët e tij politikë si të majtë të dobët, të cilëve u mungon vendosmëria për të luftuar armiqtë e Izraelit dhe guximi për t'u përballur me kritikët e tij jashtë vendit.
Por mbetet një pyetje e madhe nëse Netanyahu – i cili mbush 77 vjeç pak para zgjedhjeve – mund të vazhdojë ta paraqesë veten si personi më i përshtatshëm për të udhëhequr Izraelin në çështjet e sigurisë kombëtare dhe diplomacisë, tha Yohanan Plesner, president i Institutit jopartiak për Demokracinë në Izrael (IDI).
"Në thelb, bëhet fjalë për të njëjtën fushatë që nga mesi i viteve '90. Ajo përfshin disa elemente. Së pari, kushdo që më kundërshton është një kandidat i dobët i së majtës dhe unë do ta mbroj vendin nga kërcënimi i krijimit të një shteti palestinez në zemër të Izraelit, i cili do të shkaktonte një tjetër 7 tetor."
Në javët e fundit, Netanyahu është detyruar të mohojë raportimet e mediave se partnerët e tij në Lindjen e Mesme e kishin paralajmëruar për një sulm të mundshëm të Hamasit; këto pretendime janë shfrytëzuar nga rivalët e tij politikë.
Sulmi i Hamasit shkaktoi një luftë në fronte të shumta, në të cilën ushtria izraelite pati disa suksese kundër grupit palestinez dhe aleatëve të tij, Hezbollahut dhe Iranit, por arriti pak përfitime strategjike. Netanyahu thotë se konflikti e ka transformuar dhe do të vazhdojë ta transformojë rajonin.
Megjithatë, sjellja e Izraelit në luftën në Gaza – me dhjetëra mijëra palestinezë të vrarë dhe pjesën më të madhe të enklavës të shkatërruar – ka çuar në një izolim më të thellë diplomatik. Dhjetëra delegatë në Kombet e Bashkuara dolën nga salla kur ai nisi fjalimin e tij në mbledhjen e Asamblesë së Përgjithshme me liderët botërorë javën e kaluar. Mbështetja për Izraelin ka rënë edhe te aleati i tij më i rëndësishëm, Shtetet e Bashkuara.
Një tjetër aspekt ka të bëjë me nxitjen e frikës apo alarmit lidhur me ndikimin e tepërt të partive arabe, në rast se pala tjetër – ajo në opozitë me zotin Netanyahu – i fiton zgjedhjet. Mesazhi është se ata ka gjasa të mbështeten te partitë arabe dhe, rrjedhimisht, siguria jonë do të vihet në rrezik, pasi ato parti nuk do t'i kenë interesat më të larta të sigurisë kombëtare si prioritetin e tyre kryesor, e kështu me radhë. Pra, kjo ka qenë sërish një temë fushate – me nivele të ndryshme intensiteti që nga mesi i viteve '90 – dhe ka rezultuar e suksesshme.
Në fushatën e fundit të Netanyahut në vitin 2019, Donald Trump shfaqej duke i dhënë dorën Netanyahut në posterat zgjedhorë. Këtë herë, imazhi i presidentit amerikan ka munguar në videot e fushatës së partisë Likud.
Megjithatë, lideri izraelit me shërbimin më të gjatë – i zgjedhur për herë të parë kryeministër në vitin 1996 – nuk ka hequr dorë nga taktikat e fushatës që e kanë mbajtur në pushtet pothuajse pa ndërprerje që nga viti 2009.
Një burim pranë Netanyahut tha se kryeministri i qaset çdo palë zgjedhjesh sikur do t'i humbasë ato – dhe se kjo ishte një nga arsyet pse ai shpesh ka fituar, edhe kur gjasat ishin kundër tij.
Një burim tjetër i informuar mbi fushatën e tij tha se ekipi i Netanyahut duket i fokusuar dhe nuk shfaq asnjë shenjë paniku apo çorganizimi, pavarësisht rezultateve të sondazheve.
Fjalimi i Netanyahut në OKB, në të cilin ai mbrojti me forcë veprimet e Izraelit në rajon dhe kritikoi ashpër kundërshtarët, u pasqyrua gjerësisht në kanalin e tij në Telegram, një platformë që përdoret kryesisht për mesazhe politike.
Ai publikoi gjashtë materiale paraprake para fjalimit: një video ku shprehej se ishte "krenar që ju përfaqësoj para botës, gati për të hipur (në podium) për të luftuar për Izraelin kundër OKB-së", si dhe pesë fragmente të tjera nga fjalimi i tij.
Linku për fjalimin e plotë shoqërohej me mbishkrimin në hebraisht: "Netanyahu përballet me botën."
Një tjetër temë e njohur në fushatën e Netanyahut ka nxitur frikë te partitë që përfaqësojnë pakicën arabe të Izraelit, duke paralajmëruar se nëse rivalët e tij politikë fitojnë zgjedhjet, ata do të formojnë një qeveri me fraksione arabe që do të jenë tepër të buta ndaj palestinezëve dhe do të rrezikojnë sigurinë.
Rivali kryesor i Netanyahut është Gadi Eisenkot, një ish-shef ushtarak me qëndrime të ashpra, djali i të cilit humbi jetën gjatë shërbimit në Gaza dhe i cili drejton një parti të re të qendrës, "Yashar" – fjalë që në hebraisht do të thotë "i drejtë" ose "i ndershëm". Megjithatë, përdorimi i taktikave të njohura nga Netanyahu kundër Eisenkotit mund të mos japë rezultatin e dëshiruar, sipas Amotz Asa-El, analist politik në Institutin Shalom Hartman, duke marrë parasysh përvojën e Eisenkotit në fushën e sigurisë dhe kandidatët e partisë së tij të qendrës së djathtë.
Ndonëse sondazhet zgjedhore shpesh kanë rezultuar të pasakta, Netanyahu e di se ka pak gjasa të sigurojë një shumicë parlamentare që do t'i mundësonte formimin e qeverisë së ardhshme të Izraelit. (A2 Televizion)
A2 CNN Livestream
MUND TE LEXONI GJITHASHTU
