Protesta/ Bylykbashi: Nuk është e mjaftueshme, duhet përshkallëzuar në nivel lokal

Deputeti i Partisë Demokratike, Oerd Bylykbashi, ka folur sot për protestat që po zhvillohen prej katër muajsh në Tiranë kundër qeverisë.

Në një lidhje me “Kafe Shqeto” në "Syri TV", Bylykbashi u shpreh se duhet bërë gjithçka që protesta të ringrihet edhe në numra.

Ai shtoi më tej se është detyrë e opozitës jo vetëm të mbështesë çdo lloj proteste, por edhe të udhëheqë një lëvizje protestash të shpërndarë në të gjithë vendin.

“Është interesante që partia e opozitës në Francë del haptazi dhe kështu duhet të jetë. Opozita ka për detyrë të nxitë e organizojë dhe udhëheqë të gjitha format demokratike të protestës e rezistencës. Shqipëria është terren laboratorik ku çdo formë proteste është e domosdoshme. Për fat ne kemi 4 muaj një protestë që tregon se shqiptarët s’janë apatikë. Fakti që reziston është domethënëse. Duhet bërë çmos që protesta të ringrihet, qoftë dhe në numra, pasi është goditje që i bëhet çdo lloj forme qeverisjeje, sepse nuk mund të shkojë kaq larg.

Nuk është e mjaftueshme, duhen protesta përshkallëzuese në nivel lokal. Dikush t’i organizojë për të nxjerrë mllefin e madh që kanë, është e paimagjinueshme kjo që po ndodh në Shqipëri. Protesta është minimale. S’mund të pritet protesta me votë. Është detyra jona si opozitë jo vetëm të mbështesim çdo lloj proteste, por të udhëheqim një lëvizje protestash të shpërndarë në të gjithë vendin, pasi ky regjim duhet të marrë fund.

Duhet të mbështesim e organizojmë çdo protestë, nga ato të voglat deri në të mëdha, periodike dhe të vazhdueshme. Duhet që ajo lëvizje të përfshijë sa më shumë radhë të shoqërisë, të ikë nga apatia. Ky regjim duhet zhdukur e shkatërruar. Nëse ne do të kemi një formë qeverisjeje demokratike e normale, hapësira për protestë duhet të jetë e parashikuar, por jo të jetë e tejzgjatur, pasi është parashikuar të zgjidhet nga Kushtetuta e ligjet. Ka një ndarje të thelle mes një kaste të një kryeministri që qeveris me oligarkët dhe një kaste tjetër, të një shoqërie që vuan”, tha Bylykbashi. /CNA