Një ngjarje e rëndë ka ndodhur mëngjesin e sotëm në Lavrio, rreth 50 kilometra në jug të Athinës, ku një 32-vjeçar rumun dyshohet se ka plagosur me thikë ish-bashkëshorten e tij dhe partnerin e saj. Sipas informacioneve të para, autori ka hyrë në banesë duke përdorur një shkallë dhe ka thyer një dritare. Më pas ka sulmuar ish-gruan, 32 vjeçe, si dhe partnerin e saj, 33-vjeçarin Klevis Tite, shtetas grek me origjinë shqiptare.
Gruaja është goditur me thikë në shpinë dhe është dërguar në spitalin “Evangelismos”, ku ndodhet në gjendje të rëndë. Klevis Tite ka marrë plagë në duar dhe në pjesë të tjera të trupit dhe është transportuar në spitalin “Asklipio”. Edhe gjendja e tij paraqitet serioze. Ngjarja ka ndodhur në prani të dy fëmijëve të mitur të ish-çiftit, të moshës 1 vjeç e gjysmë dhe 2 vjeç e gjysmë. Fëmijët janë marrë nën kujdesin e psikologëve, pasi ndodheshin në gjendje shoku.
Sipas mediave greke, gruaja e kishte denoncuar të paktën pesë herë ish-bashkëshortin për dhunë dhe kërcënime. Në telefonin e saj ishte aktivizuar edhe sistemi “panic button”, i cili mundëson njoftimin e menjëhershëm të policisë në rast rreziku. Sulmi u ndërpre pas ndërhyrjes së një banori të zonës, i cili ndodhej pranë banesës dhe njoftoi policinë. Forcat e rendit mbërritën pak minuta më pas dhe arrestuan 32-vjeçarin. Ai pritet të dalë para gjykatës për caktimin e masës së sigurisë.
