Një aksident masiv me 69 automjete është regjistruar në autostradën I-95 në Karolinën e Jugut, SHBA, duke shkaktuar disa të plagosur dhe bllokimin e trafikut në të dyja drejtimet.
Përplasja ndodhi të enjten në mëngjes në një urë mbi Liqenin Marion, që lidh qarqet Clarendon dhe Orangeburg. Sipas autoriteteve, në aksident u përfshinë 15 kamionë dhe 54 automjete të tjera.
Mjegulla e dendur dhe shikueshmëria e kufizuar dyshohet se kontribuuan në krijimin e një zinxhiri përplasjesh. Të paktën dy persona kanë marrë plagë të rënda, ndërsa një prej tyre u transportua me helikopter drejt spitalit.
Ekipet e emergjencës ndërhynë menjëherë në vendngjarje, ndërsa zjarrfikësit nxorën katër persona që kishin mbetur të bllokuar në automjetet e tyre.
Pavarësisht përmasave të aksidentit, autoritetet konfirmuan se nuk pati viktima.
Një dëshmitar i aksidentit, Noah Mandel, tha se pa një automjet që fillimisht nisi të nxirrte tym dhe më pas u përfshi nga flakët. Ai tregoi gjithashtu se disa persona kishin mbetur të bllokuar në automjetet e tyre.
Fakti që aksidenti ndodhi në një urë mbi Liqenin Marion e bëri situatën edhe më të rrezikshme. Sipas dëshmitarit, ishte fat që asnjë prej automjeteve nuk përfundoi në ujë.
Forcat e emergjencës qëndruan për disa orë në vendngjarje për të menaxhuar situatën dhe për të larguar automjetet e dëmtuara. Trafiku është rikthyer tashmë në normalitet. (A2 Televizion)
A2 CNN Livestream
MUND TE LEXONI GJITHASHTU
