Deputeti socialist Erion Braçe është përfshirë në një përplasje me banorët e Memaliajt, të cilët kanë protestuar paraditen e sotme pranë Kuvendit kundër shkrirjes së bashkisë së tyre dhe bashkimit me Tepelenën.
Teksa Braçe po hynte në godinën e Kuvendit, ku në Komisionin e Ligjeve po diskutohet Reforma Territoriale, banorët i kanë shprehur indinjatën për qëndrimin e mazhorancës. Situata është tensionuar, teksa një prej protestuesve i ka hedhur ujë në fytyrë deputetit socialist.
Në momentin e përplasjes, në zonë ndodheshin edhe deputetë të opozitës, mes tyre deputeti demokrat Tritan Shehu. Shehu ka ndërhyrë në situatë dhe ka marrë përsipër të qetësojë përplasjen mes Braçes dhe banorëve të Memaliajt.
Banorët kundërshtojnë ndryshimet territoriale, ndërsa në Komisionin e Ligjeve vijon diskutimi për reformën që parashikon ndryshime në organizimin e njësive vendore.
