“Ne ishim në shesh më 24 maj në Porta Ticinese. Na e ndryshuan vendndodhjen, por kjo nuk ndryshon motivimin tonë dhe dëshir&eum...
SHOWBIZ
Shqiptarja që po bën historinë në Itali, Eva Lleshaj mund të bëhet gruaja e parë që drejton tramvajin në Bologna
PiranjatPërditësimi i fundit 2 Tetor 2026, 15:04
Një shqiptare mund të bëhet pjesë e historisë së transportit publik në Bologna. Eva Lleshaj, e cila prej vitesh punon si shofere autobusi në Itali, është përzgjedhur mes 50 kandidatëve të parë nga kompania e transportit publik Tper dhe tashmë është një hap larg një sfide krejt të re: drejtimit të tramvajit.
Trajnimi për kandidatët pritet të nisë deri në fund të muajit nëntor dhe do të përgatisë drejtuesit e rinj për linjat e tramvajit që po ndërtohen në qytet, mes tyre Linja e Kuqe dhe Linja e Gjelbër.
Për Evën, kjo mundësi nuk është thjesht një ndryshim në karrierë. Ajo e përshkruan si një ëndërr që mezi pret ta realizojë gjatë një intervistë për median italiane "Il resto del Carlino"
“Për mua është një dëshirë e madhe, mezi po pres”, shprehet ajo, duke treguar emocionin që ndjen për këtë kapitull të ri. Eva ka rreth pesë vite që drejton autobusë dhe gjithçka nisi që kur mbërriti në Itali, rreth dhjetë vite më parë. Fillimisht punoi me autobusë privatë, ndërsa më pas iu bashkua Tper-it. Tani synon të kalojë nga autobusi te tramvaji.
“Më pëlqen shumë të drejtoj, para së gjithash”, tregon ajo me të qeshur. “Që kur mbërrita në Itali, gjithmonë kam dëshiruar të drejtoj autobus. Dhe fatmirësisht ia dola.”
Pas kësaj dëshire fshihet edhe një histori familjare që për Evën ka një domethënie të veçantë. Babai i saj ka qenë shofer autobusi në Shqipëri, ndërsa ajo është e vetmja nga fëmijët e tij që ka zgjedhur të ndjekë këtë profesion.
“Jam shqiptare dhe babai im ishte shofer autobusi në vendin tim. Për mua kjo do të thotë shumë”, tregon Eva.
Ajo vëren gjithashtu se në Shqipëri ende është e pazakontë të shohësh gra në drejtimin e autobusëve të transportit publik, ndaj rruga që ka ndjekur në Itali ka edhe një dimension personal për të. Eva tregon se nuk e ka përjetuar kurrë drejtimin e autobusit si një profesion që duhet t'i frikësohej. Edhe pse në rrugë përballet me biçikleta, motorë, skuterë dhe makina, ajo thotë se gjithmonë ka ditur të ruajë qetësinë.
“Nuk kam pasur kurrë frikë. Sigurisht, ka ndonjëherë vështirësi, por nuk e kam gjetur veten realisht në vështirësi. Duhet vetëm të qëndrosh e qetë dhe të flasësh qartë”, shprehet ajo.
Për Evën, tramvaji mund të sjellë një ndryshim të rëndësishëm edhe në mënyrën se si lëviz Bologna. Ajo beson se një rrjet i ri tramvajesh mund të ndihmojë në organizimin e trafikut, sigurinë rrugore dhe lehtësimin e lëvizjes në një qytet që pret shumë turistë.
“Jam e bindur se tramvaji do të jetë diçka e mrekullueshme dhe do ta përmirësojë vërtet Bolognën”, thotë ajo.
Nëse përfundon me sukses trajnimin dhe nis punën në tramvaj, Eva Lleshaj mund të bëhet gruaja e parë që drejton një tramvaj në Bologna. Një arritje që do të ishte jo vetëm një hap i rëndësishëm në karrierën e saj, por edhe një moment i veçantë për një shqiptare që ka ndjekur profesionin e babait të saj në një vend tjetër.
Dhe Eva duket se është gati për këtë sfidë. Madje, për të, puna nuk ndalet as në oraret e zakonshme: ajo tregon se punon me turne të ndryshme dhe se pasioni për drejtimin e mjeteve është arsyeja që e mban gjithmonë të motivuar.
