Tensione dhe debate janë shënuar në Komisionin e Çështjeve Ligjore, ku mazhoranca dhe opozita janë përplasur lidhur me Reformën Territoriale dhe ndarjen e re administrative.
Në një moment të debatit, deputeti demokrat Xhelal Mziu ka nxjerrë përpara kryetarit të Komisionit, Ulsi Manjës, dosjet që lidhen me konsultimet me bashkitë për reformën.
Mziu i ka hapur njëra pas tjetrës dosjet, duke pretenduar se ato nuk përmbajnë dokumentacion konkret dhe se konsultimet e paraqitura nga mazhoranca janë pa materiale të shkruara.
Deputeti demokrat e ka përdorur këtë moment për të kundërshtuar mënyrën se si po paraqitet procesi i konsultimit, duke e cilësuar atë si propagandë dhe duke kërkuar prova e dokumente konkrete për konsultimet me pushtetin vendor.
Debatet kanë vijuar edhe për nismat e tjera të mazhorancës dhe opozitës, ndërsa mbledhja është shoqëruar me tensione të vazhdueshme mes deputetëve.
