Ekzekutimi i Christa Pike në Tennessee dështoi pasi 50-vjeçarja i mbijetoi dy dozave të pentobarbitalit, duke bërë që procedura të ndërpritej dhe ajo të dërgohej në spital.
Detajet e rreth dy orëve brenda dhomës së ekzekutimit janë bërë publike nga gazetarët e Associated Press, të cilët ishin dëshmitarë të procedurës.
Pike, e dënuar me vdekje për torturimin dhe vrasjen e 19-vjeçares Colleen Slemmer në vitin 1995, ishte 18 vjeçe në kohën e krimit. Ajo pritej të ishte gruaja e parë e ekzekutuar në Tennessee pas më shumë se dy shekujsh.
Në orën 19:27, zyrtarët ngritën perden e dhomës së ekzekutimit. Pike ishte e lidhur në barelë dhe kishte një linjë intravenoze në krah.
Pak minuta më vonë, asaj iu dha mundësia të bënte deklaratën e fundit. “Jam gati të jem e lirë. Kjo është një ditë e lumtur”, tha ajo.
Këshilltari i saj shpirtëror qëndroi pranë saj, i foli dhe këndoi një këngë. Pike herë pas here ngrinte kokën, shikonte përreth dhe buzëqeshte. Në një moment ajo tha se kishte dhimbje në krah dhe pyeti një prej zyrtarëve nëse kjo ishte normale.
Në orën 19:46 perdja u ul. Tre minuta më vonë u ngrit sërish dhe administrata e burgut nisi dozën e dytë të pentobarbitalit, në përputhje me protokollin e parashikuar në rast se i dënuari nuk kishte ndërruar jetë pas dozës së parë.
Pas injektimit të dytë, Pike filloi të nxirrte tinguj të ngjashëm me gërhitjen. Megjithatë, ajo vazhdonte të merrte frymë. Gjendja e saj vijoi për rreth një orë, ndërsa ekzekutimi nuk po përfundonte.
Rreth orës 20:22, avokati i saj Randy Spivey kërkoi akses në telefon për të kontaktuar pjesëtarët e tjerë të ekipit ligjor. Ai kërkoi që ekzekutimi të ndërpritej dhe Pike të merrte ndihmë mjekësore.
Rreth orës 20:50, avokati mori konfirmimin se ambulanca ishte nisur drejt burgut. Mjetet e emergjencës dhe zjarrfikësit mbërritën jashtë institucionit rreth orës 21:14.
Autoritetet e Departamentit të Burgjeve në Tennessee deklaruan se procedura ishte zhvilluar sipas protokollit, por nuk dhanë një shpjegim se çfarë kishte shkaktuar dështimin e ekzekutimit.
Pas incidentit, guvernatori i Tennessee, Bill Lee, urdhëroi një rishikim të procedurave dhe shtyu një tjetër ekzekutim që ishte planifikuar për më vonë gjatë vitit.
Në Nashville ndodhej edhe nëna e viktimës, May Martinez, e cila kishte udhëtuar për të dëshmuar ekzekutimin e Pike. Pas dështimit të procedurës, ajo tha për Associated Press se nuk kishte marrë drejtësi për vajzën e saj.
Ndërkohë, Pike u dërgua në spital, ku mjekët po kujdesen për gjendjen e saj pas mbijetesës së dy dozave të injektimit vdekjeprurës.