Kosi grek dhe gjiza janë dy produkte të njohura të bulmetit, të pasura me proteina dhe kalcium. Me kalimin e moshës, zgjedhja e ushqimeve të duhura mund të ndihmojë në ruajtjen e masës muskulore, forcimin e kockave dhe mbështetjen e shëndetit të përgjithshëm. Edhe pse të dyja ushqimet kanë vlera të rëndësishme ushqyese, kosi grek mund të ketë një avantazh të lehtë për një plakje më të shëndetshme.
Kosi grek apo gjiza?
Ekspertët theksojnë se zgjedhja varet edhe nga objektivat shëndetësore, historia mjekësore dhe mënyra se sa shpesh konsumohen këto produkte. Kosi grek filtrohet më shumë se kosi i zakonshëm. Si rezultat, ai zakonisht ka më shumë proteina, më pak karbohidrate dhe laktozë dhe një përqendrim më të lartë të disa lëndëve ushqyese. Kosi grek është gjithashtu një produkt i fermentuar. Disa lloje përmbajnë kultura të gjalla bakteriale, të cilat mund të ofrojnë përfitime shtesë për shëndetin e zorrëve dhe metabolizmin, si dhe të ndihmojnë në ndjesinë e ngopjes dhe menaxhimin e peshës. Edhe disa lloje gjize përmbajnë kultura të gjalla. Për këtë arsye, ekspertët këshillojnë të kontrollohet etiketa ushqyese kur blihet produkti.
Çfarë ndryshon mes tyre?
Në një porcion standard, gjiza mund të ketë pak më shumë proteina, por edhe shumë më tepër natrium.
Një filxhan gjizë me 2% yndyrë përmban rreth:
- 180 kalori;
- 23.5 gramë proteina;
- 5 gramë yndyrë;
- 250 mg kalcium;
- 280 mg kalium;
- 700 mg natrium.
Ndërsa 200 gramë kos grek me pak yndyrë përmbajnë rreth:
- 146 kalori;
- 20 gramë proteina;
- 4 gramë yndyrë;
- 230 mg kalcium;
- 280 mg kalium;
- vetëm 70 mg natrium.
Pra, edhe pse gjiza ka pak më shumë proteina, ndryshimi më i madh është sasia e natriumit.
Pse kosi grek mund të jetë më i përshtatshëm për plakje të shëndetshme?
Konsumimi i tepërt i natriumit mund të rrisë presionin e gjakut, duke shtuar rrezikun për sëmundje të zemrës. Shoqata Amerikane e Zemrës rekomandon një kufi ideal prej 1,500 mg natrium në ditë, ndërsa udhëzimet amerikane për ushqyerjen vendosin kufirin në 2,300 mg. Një porcion gjize mund të jetë pjesë e një diete të ekuilibruar, por konsumimi i disa porcioneve në ditë, sidomos së bashku me ushqime të tjera të pasura me kripë, mund të çojë shpejt në marrjen e tepërt të natriumit.
Përfitimet e kosit grek
Kosi grek është lidhur me disa përfitime të mundshme shëndetësore, përfshirë:
- përmirësimin e disa treguesve të inflamacionit;
uljen e rrezikut për diabetin e tipit 2, veçanërisht për shkak të natyrës së tij si produkt i fermentuar;
mbështetjen e shëndetit kardiovaskular;
përmirësimin e diversitetit të baktereve të dobishme në zorrë.
Po gjiza, çfarë përfitimesh ka?
Edhe gjiza mbetet një ushqim me vlera të larta ushqyese.
Ajo mund të ndihmojë në:
- stimulimin e prodhimit të proteinave muskulore dhe ruajtjen e muskujve;
- mbështetjen e masës muskulore dhe forcës;
- shëndetin e kockave, falë përmbajtjes së kalciumit, proteinave dhe fosforit;
- rritjen e ndjesisë së ngopjes, për shkak të përmbajtjes së lartë të proteinave.
Këto përfitime mund të jenë veçanërisht të rëndësishme për të rriturit në moshë, të cilët duhet të kujdesen për ruajtjen e muskujve dhe kockave. Megjithatë, për shkak të përmbajtjes së natriumit, gjiza duhet konsumuar me masë, veçanërisht nga personat që duhet të kufizojnë kripën në dietë.
