E rëndë në SHBA/ Nëna vret vajzën e mitur më pas veten pasi gjykata i hoqi kujdestarinë
Një ngjarje e rëndë ka tronditur Hjustonin në Teksas të SHBA-ve, pasi një nënë 35-vjeçare ka qëlluar për vdekje vajzën e saj të mitur dhe më pas veten.
Mediat ndërkombëtare raportojnë se shkak është bërë vendimi i gjykatës i cili i ka dhënë kujdestarinë bashkëshortit të 35-vjeçares Cibel Savela.
Raportohet se Cibel Savela do të duhet t’i dorëzonte të martën vajzën 4-vjeçare, Vivian, bashkëshortit të saj Aaron Savela.
Por në vend të kësaj, sipas ABC13 , ajo qëlloi për vdekje fëmijën brenda shtëpisë së saj në Hjuston dhe më pas e drejtoi armën nga vetja.
“Më herët atë ditë pati një seancë dëgjimore për kujdestarinë e fëmijës që nuk shkoi mirë për nënën”, tha togeri i policisë së Hjustonit, Larry Crowson.
“Ajo u kthye në shtëpi, qëlloi 4-vjeçaren dhe pastaj qëlloi veten”, shtoi ai.
35-vjeçarja u dërgua fillimisht në spital, por ndërroi jetë nga plagët e marra një ditë më vonë.
Mosmarrëveshja për kujdestarinë
Savela, e cila ishte me origjinë nga Brazili, u divorcua nga Aaron Savela në nëntor 2024 pas katër vitesh martesë. Pasoi një betejë e nxehtë ligjore për kujdestarinë e vajzës së tyre.
Sipas dokumenteve të gjykatës, një vendim i ri u lëshua kundër nënës rreth tetë orë para tragjedisë.
Ndër të tjera, asaj i ndalohej të fliste me të bijën në portugalisht, përveç nëse ishte i pranishëm një mbikëqyrës që e dinte gjuhën. Asaj gjithashtu nuk i lejohej të ndiqte shfaqjet shkollore dhe aktivitetet jashtëshkollore të fëmijës.
