Protestat e nxënësve të shkollave të mesme në Francë janë përshkallëzuar, me përplasje mes demonstruesve dhe forcave të policisë në disa qytete të vendit.
Në Strasburg, policia përdori gaz lotsjellës për shpërndarjen e protestuesve, ndërsa në Marsejë demonstruesit hodhën fishekzjarre drejt forcave të rendit. Në Rennes u dogjën kazanë plehrash, ndërsa në Pantin, në periferi të Parisit, protestuesit dogjën gardhe dhe hodhën fishekzjarre në drejtim të policisë.
Protestat, të cilat nisën në rajonin e Parisit rreth 10 ditë më parë, janë përhapur në mbarë Francën. Nxënësit kërkojnë përmirësimin e kushteve në shkolla, më shumë mësues, uljen e numrit të nxënësve në klasa dhe investime në infrastrukturën arsimore. Raportimet e fundit tregojnë se rreth 400 shkolla të mesme mbetën të mbyllura të premten, ndërsa qindra institucione të tjera u prekën nga bllokimet dhe protestat.
Situata është shoqëruar edhe me një numër të lartë arrestimesh. Autoritetet franceze raportojnë rreth 2 mijë persona të arrestuar që nga nisja e përshkallëzimit të protestave, pjesa më e madhe e tyre adoleshentë. Të enjten, vetëm gjatë një dite, u arrestuan 1,949 persona, ndërsa autoritetet raportuan edhe qindra efektivë policie, xhandarë dhe zjarrfikës të plagosur.
Ministri francez i Drejtësisë, Gérald Darmanin, ka deklaruar se një pjesë e protestave është ndikuar nga persona të jashtëm dhe ka kërkuar që prindërit të mbajnë përgjegjësi për dëmet e shkaktuara nga fëmijët e tyre. Ai ka paralajmëruar gjithashtu për rrezikun e përshkallëzimit të mëtejshëm të dhunës gjatë ditëve në vijim.
Ndërkohë, sindikatat e mësuesve kanë bërë thirrje për grevë dhe kanë kërkuar më shumë investime në sistemin arsimor. Protestat lidhen gjithashtu me projektbuxhetin e vitit 2027, ndërsa pakënaqësitë e nxënësve përfshijnë edhe oraret e gjata mësimore, mungesën e stafit dhe gjendjen e godinave shkollore.
Protestat pritet të vijojnë edhe në ditët e ardhshme, ndërsa autoritetet franceze po përpiqen të frenojnë përshkallëzimin e dhunës dhe njëkohësisht të adresojnë kërkesat e nxënësve dhe studentëve.
Protesting French students hurled fire crackers at riot police in Pantin, near Paris, as nationwide demonstrations over teacher shortages and overcrowded classrooms turn violent, with about 400 schools closed https://t.co/zTOjioxiqm https://t.co/n7Y5Mk3yIf
— Reuters (@Reuters) October 2, 2026